(کابل ټکی کام، ۱۳۹۷، غبرګولی ۵) د پاکستان د پنجاب ايالت په سيالکوټ سيمه کې د سني ملايانو يوې قهرېدلې ډلې د قاديانيانو يو پخوانی مسجد نړولی دی.
ځايي اوسېدونکو ويلي، چې سلګونه کسانو په سيالکوټ کې د احمديانو په يوه مسجد د شپې له خوا هجوم وروړی د مسجد ديوالونه، منارې او ګونبدې يې نړولي دي.
قاديانيان د پاکستان په ډيری سيمو کې شته د دغې هېواد په پوځ او ادارو کې هم شتون لري خو د پاکستان د قانون له مخې احمديان يا قاديانيان ځان ته مسلمانان نه شي ويلی او نه هم د اسلام او مسلمانانو اړوند د نښو کارولو اجازه لري.
د احمدي ډلې يوه وياند صلاح الدين رسنيو ته ويلي، دا يرغل د سيمه ييز حکومت او يرغلګرو په هماهنګۍ ترسره شوی دی.
خو د پنجاب حکومت دا تورونه رد کړي او د پېښې د پلټنې ژمنه يې کړې ده.
د پاکستان تحریک انصاف ګوند د پېښې غندنه کړې او د پنجاب له حکومت يې غوښتي چې په پېښې کې ککړ کسان دې ونيول شوي او د ټولو مذهبي لګیو لپاره دې امنيت خوندي کړل شي.
