هغه افغان چې څلور میاشتې وړاندې یې د امریکا ولسمشر ډونلډ ټرمپ ته د ”شجاعت“ مډال جوړ کړی و ووژل شو.
طالبانو د نوموړي د وژلو مسؤلیت پر غاړه اخیستی.
د طالبانو ویاند، ذبیح الله مجاهد، پر خپل ټوېټر لیکلي چې، د تیرې جمعې په ورځ، د ګل نبي په نوم ټرمپ ته د شجاعت مډال جوړوونکی افغان د ماین په یوه ”تکتیکي چاودنه“ کې ووژل شو.
د شجاعت مډال
د روان ۲۰۱۸ز کال د جنوري په میاشت کې، د لوګر ولایت ځینو اوسېدونکو د پاکستان پر وړاندې د ټرمپ د ټویټونو له امله نوموړي ته د ۴۵ زره افغانیو په ارزښت د سرو زرو مډال جوړ کړ او نوموړی یې وستایه.
ګل نبي او په لوګر کې د سیمه ییزو اربکیانو یو قومندان، فرهاد اکبري، چې د مډال جوړولو پېشنهاد یې کړی و، وروسته د ”شجاعت“ دا مډال په کابل کې د امریکا سفارت ته وسپاره، چې ټرمپ ته ورسېږي.
ګل نبي او فرهاد اکبري په دې اړه له طلوع نیوز ټلوېزون سره د خبرو پر مهال د خپل اقدام ننګه وکړه او دا یې پر ځای اقدام بللی و.
ډونلډ ټرمپ د ۲۰۱۸ز کال په پیل کې پر پاکستان سختې نیوکې وکړې.
نوموړي پر خپل ټوېټر ولیکل:” امريکا په تېرو ١٥کلونو کې په احمقانه ډول پاکستان ته څه د پاسه ٣٣ ميليارده ډالر مرسته کړې، خو هغوى له دروغو او غولونې پرته موږ ته هېڅ نه دي راکړي، او زموږ پر مشرانو يې د ساده گانو گومان کړى. دوى هغو ترهگرو ته خوندي ځايونه ورکړي چې موږ يې افغانستان کې لټوو. موږ سره يې په دې برخه کې ډېره کمه مرسته کړې او دا حالت نور دوام نشي کولاى.“
فرهاد اکبري له بي بي سي فارسی سره د خبرو پر مهال وویل، ”د یاد مډال پر جوړولو ۴۵ زره افغانۍ لګښت شوی، چې ۱۵ ګرامه سره زر پرې واخیستل شول او وروسته پرې ولیکل شول، ’مدال شجاعت، از طرف مردم افغانستان برای دونالد ترامپ رئیس جمهوری آمریکا‘، (’د امریکا جمهور رییس ډونلډ ټرمپ ته د افغانستان د خلکو لخوا د شجاعت مډال‘).“
فرهاد اکبري وړاندې هم ویلي و چې د ټرمپ د ستایلو او هغه ته د مډال جوړولو له امله، نوموړي او د مډال په جوړولو کې شریکو ملګرو ته یې د مرګ ګواښونه شوي دي.
