(کابل ټکی کام ۱۳۹۷ غبرګولی ۷)
د کابل ښار د لومړي مکروریانو اوسیدونکي وایي، چې په دې سیمه د خپلسرو وسلوالو شتون دوی ته ستونزې زیاتې کړې او که مخه یې ونه نیول شي، ښایي دا حالت په یوه ناورین بدل شي.
دا زورواکان چې زیاتره حکومتي چارواکي، د ولسي جرګې غړي او نورې سیاسي کړۍ دي د خپلو وسلوالو په مټ هرځای امنیتي پوستې جوړوي، او خلک ازاروي.
د سیمې اوسیدونکي وایی؛ هغوی ورسره سخت چلند کوي ، د دوی ناموسونو ته په سپکه ګوري او که یې پر وړاندې اقدام، یا له ځان څخه دفاع کوي له سخت غبرګون سره مخ کیږي.
د رومان په نامه د سیمې یو تن پژواک ته ویلي “څو ورځې وړاندې د یو بلاک درې هلکان په خپل موټر کې له یوې تنګې لارې د تېرېدو په حال کې وو، د یادو چارواکو له یو موټرسره مخ شول؛ خو دا چې د یاد موټر مخ کېدو ته ځای نه و او لار د څو شېبو لپاره بنده شوه، د پارلمان د یاد وکیل ساتونکو د ټوپک پر کنداغ دا درې ځوانان سخت ووهل“
خلک له حکومت نه غواړي، چې د دې ساحې په امنیت کې کوټلي ګامونه واخلي او د زورواکانو پوستې دې له سیمې ورټولې کړي.
د مکروریانونو د ساتنې او څارنې ریاست یوه کارکوونکی وایي؛ د زورواکو د پوستو په جوړولو او د زیاتو ساتونکو په ګومارنې سره، دې ساحې د جګړې د ډګر رنګ خپل کړی دی.
بل پلو حکومت د دې کسانو پر وړاندې له اقدام کولو ډډه کوي او د کابل پولیسو د ۱۶ مې حوزې امرسمونمل محمد اصغر جهش له خلکو غواړي چې باید دا شکایت د حکومت پر ځای ولسي جرګې ته وکړي، ځکه د ده په وینا چې زیاتره زورواکي د همدې جرګې وکیلان دي.
دا په داسې حال کې ده چې د راتلونکو ټول ټاکنو نوماندانو سره له اوسه د کابل په ښار کې د امنیتي کسانو خوځښتونه زیات کړي چې دې چارې هم خلک له جدي ستونزو سره مخ او په ویره کې اچولي.
