(کابل ټکی کام، ۱۳۹۷، غبرګولی ۱۲) د غزني والي عبدالکريم متين وايي، په دغه ولايت کې دولتي ځواکونه په خپلو پوستو کې کلابند دي او له نظامي مرکزونو بهر تګ راتګ نه شي کولی.
د غزني والي زياتوي، په ځينو سيمو کې بند پاتې عسکر له طالبانو سره اړيکې لري او پر هغوی د خپلو مرکزونو مهمات او وسلې پلوري.
متين وايي، ډيری پوستې بې فايدې جوړې شوي او اعتراف کوي چې په دغه پوستو کې پراته عسکر له خپله ځانه دفاع نه شي کولی، اوس مهال عسکر په پوستو کې بند دي او يوې خوا هم حرکت نه شي کولی.
هغه وايي، د کلابندو پوستو عسکر له طالبانو سره د دې لپاره اړيکې ساتي او پر هغوی وسلې پلوري تر څو يې سر په امن د پوستې د خوشې کولو پر مهال د مرګ له ګواښه خوندي وي.
په عين حال کې د غزني د ده یک ولسوالۍ امنیتي مسئولین یو ځل بيا د يادې ولسوالۍ د سقوط ويره څرګندوي وايي، له څلورو خواوو ولسوالۍ کلابنده ده، طالبان د شپې دوربينونو، لایزري او پرمختللو وسلو څخه استفاده کوي، هره شپه پوستې سقوط کوي خو حکومت زمونږ په فکر کې نه دی.
د ملي اردو يو تن افسر حسیب الله عظيمي وايي، طالبانو ته د ولسواليو د سقوط پر مهال له اندازې زياتې وسلې او ټانګونه لاسته ورغلي دي، له څلورو خواوو کلابند يو، لارې بندې دي او هيڅ اکمالات نه کېږي.
تېره ورځ هم د شلګر ولسوالۍ په چهارديوالو سيمه کې د عسکرو دوه ټانګونه په بمونو الوزول شوي چې د طالبانو په وينا په سیمه کې د نښتو او چاودنو پر مهال يوولس عسکرو ته مرګ ژوبله اوښتې ده.
طالبانو د الخندق عملياتو له پيل راهيسې څو ولسوالۍ او په لسګونه لويې او وړې پوستې او نظامي مرکزونه له دولتي ځواکونو ونيول چې طالبانو د خبرپاڼو له مخې په ډيری سيمو کې يې د عملياتو هدف د خپلو وسلو او مهماتو پوره او د دښمن ځپل و.
هیره دې نه وي چې طالبانو له تېرې شاوخوا يوې نيمې مياشتې راهيسې غزنې کې پر دولتي ځواکونو او منسوبينو پکتيکا ته غزېدلې لاره تړلې ده.
