سبا د افغانستان او بنګله دېش د شل اوره کرکټ سياليو لړۍ پيلېږي
(کابل ټکی کام، ۱۳۹۷، غبرګولی ۱۲) د افغانستان او بنګله ديش تر منځ د کرکټ د شل اوريزو سياليو لړۍ سبا د یکشنبې په روځ د جون پر درېيمه پيلېږي.
د شل اوره کرکټ دغه سيالۍ د هند په دهرادون ښار کې د افغانستان په کوربه توب د راجيف ګاندي په نړيوال لوبغاړي کې ترسره کېږي.
د افغانستان د کرکټ بورډ اجرائيه مشر شفيق الله ستانکزی د بنګله دېش سره د دغه درې شل اوريزو لوبو ګټل ځکه مهم وبلل چې په وينا يې افغان کرکټ ملي لوبډله بايد د روان کال تر پايه د نړې د اتو غوره لوبډلو په منځ کې خپل ځای وساتي ترڅو د راتلونکي څلور اوريز نړيوال جام دوهم پړاو ته لاره پيدا کړي.
د افغانستان او بنګله دېش د شل اوريزو سياليو لړۍ به د روانې مياشتې له درېيمې تر اوومۍ نيټې روانه وي او ټاکل شوې ده چې د همدې مياشتې له څوارلسمې تر اتلسمې نيټې د بنګلور په ايم چینا سوامي لوبغالي کې له هند سره دوستانه لوبې ترسره شي.
د افغانستان کرکټ ملي لوبډله له تېرې يوې نيمې مياشتې د دغه سياليو د چمتووالي لپاره په هند کې په تمريناتو بوخته ده.
پرون ماښام د بنګله ديش کرکټ ملي لوبډلې او د افغانستان د الف لوبډلې تر منځ په تمريناتي سيالۍ کې افغانستان بنګله ديش ته په اتو ويکټو ماتې ورکړه.
