(کابل ټکی کام ۱۳۹۷ غبرګولی ۱۷)
په داسې حال کې چې طالبانو ټولو افغان امنیتي ځواکونو ته د مشروطه عفوې عمومي اعلان کړی، د ملي یووالي د حکومت مشر اشرف غني هم د څو ورځني اوربند د اعلان ژمنه کړې.
اشرف غني په یوه ویدیویي پیغام کې چې د ارګ پاڼې خپور کړی ویلي؛ په کابل کې د علماؤ د وروستۍ فتوا پر اساس د روژې له ۲۷مې نه د اختر تر پنځمې پورې اوربند اعلانوي او په عین حال کې ټولو امنیتي او دفاعي ځواکونو ته لارښوونه کوي، چې د وسله والو طالبانو خلاف تهاجمي عملیات بند کړي، خو د داعش او القاعدې او نورو نړیوالو ډلو خلاف به عملیات ادامه لري.
غني له خپلو ځواکونو غوښتي چې که امنیتي مراکز یې تر برید لاندې راتلل ځوابي بریدونو ته دې چمتو اوسي.
ولسمشر ویلي، په راتلونکو ورځو کې به د دې اوربند بشپړ جزئیات اعلان کړي.
غني داسې مهال دا اعلان کړی چې شاوخوا یوه اونۍ وړاندې طالبانو افغان امنیتي ځواکونو ته په یوه بیساري پیغام کې وویل، چې د امریکایانو له ملاتړ او د دوی پرضد له وسلوال فعالیت څخه دې لاس واخلي ، د دوی له عمومي بښنې څخه به برخمن شي.
طالبانو ویلي و، چې دوی له امنیتي ځواکونو دا نه غواړي چې د دوی لیکو ته دې ورشي، بلکې یواځې دې د بهرنیانو له لیکو را بیل شي ځکه د دوی په وینا چې مقابل لوری یې یواځې بهرني اشغالګر دي او بس.
د اشرف غني دا اعلان داسې مهال مخته راځي چې د کورنیو چارو وزارت څو ورځې وړاندې ویلي و، چې د هیواد په ۱۳ ولسوالیو کې سخته جګړه روانه ده او په ټوله کې په یوه خورا ستونزمن دفاعي حالت کې قرار لري.
ولسمشر ویلي، په راتلونکو ورځو کې به د دې اوربند بشپړ جزئیات اعلان کړي.
طالبانو تر اوسه د غني د دې اعلان پر وړاندې کوم غبرګون نه دی ښوودلی خو تر دې وړاندې یې په ځلونو ویلي چې افغان امنیتي ځواکونه دې د بهرنیانو د مدافع ځواک په توګه د دوی پر وړاندې جګړې نه کوي .
