(کابل ټکی کام، ۱۳۹۷، غبرګولی ۱۷) د افغانستان د سوداګرۍ او صنايعو خونه وايي ډيری سوداګر ليواله دي چې په افغانستان کې خپله پانګونه وکړي خو زياتوي چې نا امني د پانګونې پر وړاندې لوی خنډ دی.
د یادې خونې وياند صيام الدين پسرلی وايي، د افغان پانګوالو سربيره د ترکيې، ایران، چین، هندوستان او پاکستاني پانګوال خوښوي چې د معدنو، کرنې او انرژۍ د صنعت په برخه کې پانګونه وکړي خو زياتوي چې په هېواد کې نا امنۍ، انسان تښتونې، چاودنو او سرتيرو بريدونو له پانګونې زړه توري کړي دي.
د پسرلي په وينا، په هېواد کې درې نړيوال نندارتونونه د دې له کبله لغوه شول چې امنیت نشته.
هغه وويل، حکومت او امنيتي مسئولين دې د امنيت په راوستلو کې جدي اقدام وکړي ترڅو سوداګر په هېواد کې پانګونې ته زړه ښه کړي.
د سوداګر خونې چارواکي وايي، د وروستيو نا امنيو له کبله سوداګرو د هېواد په بېلابېلو ولايتونو کې د پانګونې کچه کمه کړې او آن ځينې سوداګر هڅه کوي چې خپلې پانګې بهرنيو هېوادونو لکه قزاقستان، متحده عربي اماراتو او ترکيې ته انتقال کړي.
