(کابل ټکی کام ۱۳۹۷ غبرګولی ۱۸)
د ګالوپ په نامه یوې نړیوالې مؤسسې د حکومتي نظامونو د محبوبیت او ډاډمن امن په اړه د نړۍ په لسګونو هیوادونو کې یوه څیړنه تر سره کړې چې افغانستان یې په وروستۍ کټګورۍ کې راوستلی.
په څیړنه کې چې ۱۴۳ هیوادونو کې ترسره شوې، ۱۴۸ زره کسان پوښتل شوي چې د قانون او نظم په هکله ، همداراز د ډاډمن ګرځیدو په تړاو ترې مختلفې پوښتنې شوې.
یاده څیړنه چې پر ۲۰۱۷ کال کې ترسره شوې پایلې یې ښیي چې؛ د نړۍ ۶۹ سلنه وګړي د پولیسو له کړنو ډاډ څرګندوي ۶۸ سلنه یې د شپې په ډاډه زړه تګ راتګ کولی شي.
۵ سلنو وګړو ویلي چې تر یرغل لاندې او یرغمل شوي او د آزادۍ د نشتون له کبله په ځوریدلي حالت کې قرار لري.
د ګالوپ مؤسسې د هیواد د وګړو د شمیر په حساب درجه بندي کړې، سنګاپور په کې لومړی مقام خپل کړی، چې وګړي یې د هیواد له قانوني نظم نه په پوره معنا خوښ دي، وینزویلا تر ټولو وروستۍ راغلې چې تر ټولو زیات خلک یې د يولیسو له چلند او عامه نظم څخه ناراضه دي.
په سروې کې افغانستان ۱۴۲ ځای خپل کړی چې د وینزویلا نه یواځې یوه درجه وړاندې ده او خلکو یې یادې پوښتونکې ادارې ته د امنیتي ځواکونو له کړنو سخت شکایتونه کړ.
