(کابل ټکی کام، ۱۳۹۷، غبرګولی ۱۹) د ولسمشر غني سربيره د افغانستان پخواني ولمشر حامدکرزي او د ولسي جرګې غړو د افغان حکومت او طالبانو تر منځ د اوربند هرکلی کړی دی.
ولسمشر غني په خپله رسمي فسبوک پاڼه ليکي، “د اوربند په اړه د افغانستان د اسلامي جمهوري دولت له نيک نوښت څخه وروسته طالبانو هم د اختر په ورځو او شپو کې د اوربند اعلان کړی، موږ نه يوازې ددې بلکې د هر هغه اقدام چې د وينې د بهېدو مخنيوی کوي، هر کلی کوو”.
دغه راز د پخواني ولسمشر حامدکرزي د دفتر له لوري رسنيو ته په لېږلې خبرپاڼه کې د طالبانو له لوري د اوربند هرکلی کړی او هيله يې ښودلې چې دغه اوربند به د سولې خبرو لپاره زمينه برابره کړي.
کرزي، له حکومت او طالبانو غوښتي چې اوربند وغځوي ترڅو د جګړو د پای ته رسولو په حللاره فکر وشي او په هېواد کې دايمه سوله راشي.
همدارنګه ولسي جرګې هم د افغان او طالبانو تر منځ د لنډ مهالي اوربند ملاتړ کړی او د جرګې رئيس عبدالرووف ابراهيمي په ننۍ غونډه کې وويل:” ولسي جرګه له هرې هغې پرېکړې ملاتړ کوي چې د ملت ګټه او خیر پکې خوندي وي”.
د ولسي جرګې د مشر او د جرګې يو شمير نورو غړو هيله څرګنده کړه چې د دواړو لوریو رامنځته شوی لنډمهالی اوربند جګړې ختمې او سولې ته لاره هواره کړي.
څو ورځې مخکې اشرف غني وويل چې د روژې ورځې له پنځه ويشتمې تر پنځمې پورې اوربند اعلانوم او خپلو نظاميانو ته امر کوم چې په دغې ورځو کې پر افغان طالبانو خپل عمليات ودروي.
تېره ورځ طالبانو هم خپلو پلويانو ته امر وکړ چې د اختر له لومړۍ ورځې نيولې تر درېيمې ورځې پورې دې په “ټول هیواد کې د داخلي مخالیفینو پرضد تعرضي عملیات ودروي، خو که په مجاهدینو تعرض وشي کلکه دفاع دې کوي”.
طالبانو ويلي، بهرني ځواکونه له ياد حکم څخه مستثنی دي، د هغوی پرضد به عمليات روان وي او هرځای دې د بريدونو لاندې ونيول شي.
طالبانو دغه راز د اوربند په اړه په خپره کړې اعلاميه کې د دولت د نظامي بنديانو او عسکرو د خوشې کولو په اړه هم سپارښتنې کړي او زياتوي: (د نظامي کمیسیون مسئولین او د ولایاتو والیان دې په خپلو اړوندو بندیخانو کې هغه بندیان تشخیص کړي او په اړه دي يې د مشرتابه مقام ته معلومات ورکړي چي کوم په اینده کې د دښمن په صف کې د نه دریدو تضمین ورکولای شي او د مجاهدینو پرضد د فعالیت نه کولو ژمنه کولای شي، تر څو یې له زندان څخه د خلاصون په اړه مشرتابه تصمیم ونیسي.)
