(کابل ټکی کام، ۱۳۹۷، غبرګولی ۲۹) د هرات امنيتي مسئولين وايي، د ملي امنيت ځواکونو په ډزو هرات ښار کې څلورو ملکيانو ته مرګ ژوبله اوښتې ده.
د هرات د پوليسو وياند عبدالاحد ولي زاده وايي، په يادو کسانو هغه مهال د ملي امنيت عسکرو ډزې وکړې چې موټر يې د پلټنې پوستې ته ونه درواه.
د ولي زاده په خبره، د ملي امنيت عسکرو په ډزو درې تنه وژل شوي او يو تن سخت ټپي شوی دی.
نوموړی وايي، په يادو کسانو کې يو تن د ملي امنيت ادارې ته مطلوب و او په ځينو جرمي پېښو ککړ و.
د هرات د حوزوي روغتون ویاند تاييدوي چې د پېښې له ځای څخه درې تنه جسدونه او ټپي روغتون ته وروړل شوي دي.
دا لومړی ځل نه دی، چې د پوليسو له لوري په عامو خلکو ډزې کېږي بلکې تر دې مخکې هم د هېواد په بېلابېلو سيمو کې د ولسي خلکو پر موټرو ډزې شوي او ډیری موټرچلوونکي عسکرو ته د پيسو نه ورکولو پر وخت پر ډزو وژل شوي دي.
