نعمان لطیف
که څه هم امریکایان تردې دمه نه غواړي دطالبانو سره مخامخ مذاکراتو ته دتابیا راپورونه یې رسنیز شی چې له امله به یې په نړیواله کچه ترلاسه کړی رُعب او مشري پیکه شي؛ دلته تر امریکایانو زیات زور دکابل واکمنانو ته ورغلی دی
دنیو یارک ټایمز له راپور سره سم یې پوزې وپړسېدلې، رنگونه یې واوښتل او شور یې گډ کړ چې گواکې امریکایان له طالبانو سره خبرې نه کوي بلکې دکابل او طالبانو تر مابین د سولې د خبرو لپاره یوازې سهولتونه برابروي
دوی باید دا حقایق ومني چې اخر به هم د افغان جگړې او ثبات مذاکرات دطالبانو او امریکایانو تر مابین کیږي. دا ځکه چې هېواد کې د بې ثباتي عاملین او د روانې جگړې مهم لوری امریکایان دي
کابل په دې برخه کې نه کوم نقش لري او نه یې لوبولای شي. دوی که د کوم نقش دعوه کوي یا ځان غولوي، یا یې د ولس غولولو کوښښ شروع کړی دی
۱۷ کاله شاته که وگرځو او دروانې جگړې شالید وپلټو؛ پیل یې لکه لمر جؤت دی او همچنان یې اړخونه صاف او سوتره څرگند دي
امریکایي ولس مشر جورج بُش دطالبانو خلاف جگړه اعلان کړه او په افغانستان یې یرغل راؤړ؛ هغه مهال اسلامي امارت په کابل واکمن ؤ او کابو په ټول هېواد یې تسلط درلود
امریکایانو له همهغه ځایه یو څو غلامان له ځانه سره راوستل، دطالبانو مشروع نظام یې دزور او زر په مټ له منځه یؤړ، دملت غولؤنې په پار یې ظاهراً هغوی ته دواک واگې په لاسونو کې ورکړې خو باطن کې د واک واگې، او دپرېکړو صلاحیت یې له ځانه سره وساته
آن تر اوسه دوزیرانو، وکیلانو، سناتورانو انتخاب له امریکایي سفارت کیږي، حتی د ملي وحدت حکومت چې ډاکټر صیب غني یې دپوره خپلواکۍ، او ولسواکۍ سرېندې ږغوي، د امریکایانو د خارجه وزیر په لاس وپنځېده
څو ورځې وړاندې امریکایي ورځپاڼې نیو یارک ټایمز د افغان جگړې دختمېدو په اړه دطالبانو سره دمخامخ مذاکراتو خبره یاده کړه، ورسره جوخت په کابل کې دیرغلگرو قواؤو مشر نیکولسن هم ومنله چې گویا له طالبانو سره مخامخ مذاکرات کېدلای شي
امریکایانو چې دکابل وارخطایي او پرېشاني ولېدله، پخپلو غلامانو یې زړه درد وکړ. دمنافقانه عادت له مخې یې ژر ژبه بدله کړه او دمخامخ مذاکراتو خبرې اوازې وبللې. البته دغلامانو درضا ساتلو لپاره یې وویل: موږ دطالبانو سره مذاکرات نه کوو بلکې دکابل حکومت او طالبانو تر مابین دمذاکراتو لپاره لاره هوارؤو
صلیبیان پخپل تاریخ کې له غلامانو سره د وفا څپرکی نه لري؛ که دوی چېرې مات شوي دي، غلامان یې دمقابل جهت رحم او کرم ته پرېښودي دي او که مقصد ته رسېدلي دي بیا یې خپله منزوی کړي او وژلي دي
دکابل واکمنان باید وپوهېږي چې پای یې نږدې شوی دی او امریکایانو ته ددوی تر گټو، خپلې گټې عزیزي او محترمې دي
اوس امریکایان مجبور دي دخپلو گټو په خاطر، دباعزته وتلو سوال ته دطالبانو پر وړاندې زنگون قات کړي
وروستي مراحل دي. هره خوا دخپلو گټو دخوندیتابه په لټه کې ده
امریکایان دخپلو گټو په لټه کې دي، او طالبان دخپل مقاومت او قربانیو په بدل کې وروستي ارمان ته چې د اسلامي نظام قیام دی، درسېدلو هڅې کوي؛ له تاریخي عار دخلاصون لپاره دکابل گوډاگیانو ته پکار ده چې د اخلاقي جرأت مظاهره وکړي، او د “ما مه شمېره در گډ یم” له شرمؤنکې نعرې تېر شي
او په را روان وروستي پړاؤ کې چې ډېر حساس او ټاکونکی دی، له امریکایي سازشونو پردې پورته کړي او د افغانانو د ښه ژؤند او باثباته افغانستان لپاره د طالبانو له دریځ غوڅ ملاتړ وکړي
هم به دوی خوندي پاته شي او هم به یې تاریخ ته مخونه سپین شي
