جنرال دوستم راغی او بیا ځلې د نړۍ د دویم مفکر اشرف غني لومړی مرستیال شو. جنرال دوستم به د راتلونکو ولسمشریزو ټاکنو کې د اشرف غني له خوا وکارول شي او د زرگونه ازبکو ملاتړ به بیا خپل کړي. راتلونکي دوو کلونو کې به د اشرف غني او جنرال دوستم ترمنځ هېڅ اختلاف رسنیز نه شي او اشرف غني به ټوله هڅه وکړي، چې دوستم په هر لحاظ وي، راضي وساتي او کېدای شي که اشرف غني بیا واک ته ورسېږي، بیا یې د ترکیې مېلمه کړي.
د لنډ وخت لهپاره به ازبک خوښ وساتل شي او د احمد ایشچي دوسیه به همداسې تړلې پاتې وي. کېدای شي د پردې تر شا وختي یوه معامله شوي وي؛ خو احمد ایشچي له خپلې قضیې نه تېرېږي او د جنرال دوستم علني محاکمه غواړي، خو دغه غوښتنه یې اوسنی نظام نه شي پوره کولی. ځکه زورواکي لا تراوسه په خپل حال پاتې ده او د اوسني حکومت ټول لوړ پوړي چارواکي باید د زندان ابدي مېلمانه شي.
ځکه د اوسني نظام عدلي او قضايي ارگانونه خپلواک نه دي او نه دومره صلاحیت لري، چې د جنرال دوستم غوندې یو کس ته دې د محکمه کولو فرمان هم ورولېږي. د احمد ایشچي ارمان به هله پوره شي او دوستم به د محکمې مېز ته راکش کړل شي، چې دلته یو خپلواک، اسلامي او شرعي نظام وي؛ خو هغه وخت به دوستم خدای خبر په کومه سوړه ننوتی وي؟
د قیصاري، د کومانډو عملیات، زورواکانو، غاصیبنو او جنایتکارانو نیول او بندیان کول یوازې یوه لوبه وه، چې د قیصاري په نیولو پیل شوه او د ده په خوشې کولو به پای ته ورسېږي. اشرف غني راتلونکو ټاکنو کې ځان یوازې گڼي او د ده نږدې ملاتړي ترې هم جلا شوي دي او له اشرف غني بیا ځلې ملاتړ یوازې د دوستم غوندې احمق او ناپوه انسان کولی شي، نه هوښیار او پوه انسان!
راتلونکو ولسمشریزو ټاکنو لهپاره د کورنیو چارو پخوانی وزیر عمر داوودزی، حنیف اتمر، عبدالله عبدالله، احمد ضیاء مسعود، اشرف غني او د عمر زاخېلوال اوازې ډېرې دي، چې دوی ټول به ولسمشریزو ټاکنو ته ودرېږي؛ خو گټونکی به یې بیا هم یوازې د امریکا له سفارت سره هوکړه کوونکی وي. ځینو چارواکو لا وختي امریکا ته سفرونه پیل کړي او غواړي د امریکا ملاتړ خپل کړي. دا چې په امریکا کې ولسمشر هغه کس دی، چې د افغانستان له جگړې سره هېڅ لېوالتیا نه لري، نو دغه پرېکړه د امریکا استخباراتي ادارې«C.I.A» ته پاتې کېږي او دوی به راتلونکو ټاکنو لهپاره د داسې نوماند ملاتړ وکړي، چې د امریکا هرې نادودې پر وړاندې چوپ پاتې شي او له خولې سپوڼ هم ونه باسي. که امریکایان هر جنایت، بمبار، وژل، بندي کول او له هر قانون سرغړونه کوي، باید حکومت یې پر وړاندې چوپ پاتې شي؛ ځکه د اوسنۍ جگړې تمویل امریکا کوي او د امریکا پر وړاندې درېدونکي باید د هر امر منونکي وي.
داسې اوازې هم شته، چې امریکا غواړي اوسنی د ملي یووالي حکومت راتلونکو پنځو کلونو ته نور هم وغځوي، ځکه د امریکا دغه ازمايښت په افغانستان کې ډېر بریالی و او په نړۍ کې بې ساري نظام دلته واکمن شوی دی، چې په تېرو څلورو کلونو کې یې د هېواد ټول بنسټونه له منځه یوړل او لا هم د بنسټونو په وېجاړولو لگیا دي. که دلته هر څوک واکمن وي، چې خاص د امریکا گټې خوندي کړي، نور یې کیسه کې نه دي.
