نیویارک ټایمز امریکایۍ ورځپاڼې د غزني ښار د روغتيايي چارواکو له خولې لیکلي چې د غزني ښار په جګړه کې، چې نن یې درېیمه ورځ ده، تر دې دمه تر ۱۰۰ زیات عسکر وژل شوي او لسګونه نور ټپیان شوي دي.
د غزني ښار د روغتون مسؤل، باز محمد همت، نیویارک ټایمز ته د ټلفون له لارې ویلي چې تر دې دمه روغتون ته ۱۱۳ مړي او ۱۴۲ ټپیان وروړل شوي، چې زیاتره یې دولتي ځواکونه دي.
”د روغتون ټولې خونې ډکې دي؛ اوس د روغتون دهلېزونه او نور ځایونه کاروو.“ نوموړي زیاته کړه، ”جګړه روغتون ته ډېره نږدې روانه ده. وضعیت ډېر خراب دی. هر ساعت ګڼ شمېر مړي او ټپیان راوړل کېږي.“
نیویارک ټایمز ویلي چې د تلفاتو د شمېر د پورته کېدو یقیني امکان شته ځکه تر دې دمه لا هم له ځینو سیمو مړي نه دي راټول شوي.
دې امریکایۍ ورځپاڼې همداراز د چارواکو له قوله لیکلي چې په تېرو دوو ورځو کې د هېواد په نورو برخو کې هم تر ۷۸ زیات دولتي عسکر وژل شوي دي.
که څه طالبان په ښار کې دننه او د ښار په څنډو کې سخته جګړه کوي، خو د کابل حکومت چارواکي بیا هم ټینګار کوي چې غزنی په بشپړ ډول د حکومت په لاس کې دی. ستر درستیز، جنرال محمد شریف یفتلي، نن په یوه خبري کنفرانس کې وویل، ”د غزني ښار سټراټيژيکې سیمې په بشپړ ډول د دولتي ځواکونو په لاس کې دي.“
خو بل خوا، د غزني د ولایتي شورا غړی، نصیر احمد فقیري وايي، ”د ولایت مقام، امنیه قومندانۍ او د استخباراتو د مرکز شاوخوا سخته جګړه روانه ده. په غزني کې ځواکونو ښه مقاومت وکړ، خو طبیعي ده چې زیاته اوږده جګړه یې کړې ده. کومکي ځواکونو هیڅ کوم اغېزمن کار نه دی کړی، یواځې دومره یې کړي چې خپل ځان ته یې مرکز جوړ کړ.“
نوموړي زیاته کړې، ”شاوخوا مړي پراته دي، خراب شوي دي، او هیڅوک یې د ټولولو هڅه نه کوي.“
بل خوا، د غزني امنیه قومندان، فرید احمد مشعل، د ټلفون په وسیله نیویارک ټایمز ته ویلي چې د امریکايي عسکرو په ګډون کومکي ځواکونو له ښاره د طالبانو د تصفیه کولو عملیات پیل کړي دي. نوموړي ویلي چې تر ۱۰۰۰ زیاتو طالبانو پر غزني ښار برید کړ او ۵۰۰ طالبان ترې ووژل شول.
• پر غزني ښار او دوو ولسوالیو د طالبانو برید:
طالبانو د تیرې جمعې په ورځ سهار وختي پر غزني ښار له څلورو لورو همغږي بریدونه پیل کړل. د دې عملیاتو لپاره طالبانو له ځینو نورو ولایتونو خپلې قطعې راټولې کړې او اوس د ښار دننه او شاوخوا له حکومتي ځواکونو سره په سخته جګړه بوخت دي.
پر غزني ښار د برید تر څنګ، طالبانو د دې ولایت پر دوو نورو ولسوالیو هم بریدونه پیل کړل، چې په پایله کې یې دواړو ولسوالیو سقوط وکړ.
د جمعې په ورځ (زمری ۱۹) ناوخته مهال، طالبانو د غزني په لوېديځ کې اجرستان ولسوالي ونیوله، او نن سهار (۲۱ زمری) یې خواجه عمري ولسوالي هم ونیوله.
د غزني ښار په عملیاتو کې امریکايي ځواکونه د هوا او، د غزني ښار د امنیه قومندان په خبره، د ځمکې له لارې له افغان ځواکونو سره مرسته کوي. همداراز، طلوع نیوز ته چارواکو ویلي چې د پکتیا ولایت ګردېز ښار ته هم امریکايي ځواکونه رسېدلي دي.
تر دې دمه په دې عملیاتو کې د یوې چورلکې د سقوط خبر ورکړل شوی او چارواکو هم تایید کړی دی. ویل کېږي چې تېره ورځ یوه بله چورلکه هم رانسکوره شوې، خو دولتي چارواکو په دې اړه څه دي ویلي.
طالبانو همداراز غزني ښار ته د کومکي ځواکونو د مخنیوي لپاره د کابل-کندهار لاره په میدان وردګ ولایت کې تړلې ده. تېرو درې ورځو کې، د میدان وردګو په سیداباد ولسوالۍ کې غزني ښار ته تلونکې قواوې د طالبانو تر سختو او دوامدارو برید لاندې راغلې دي. طالبان ادعا کوي چې په دې بریدونو کې د ۱۰ امریکایانو په ګډون ۳۵ کورني عسکر وژل شوي.
طالبان همداراز وايي چې امریکايي الوتکو د پولیسو پر یوه پوسته په تېروتنه بمبار هم کړی دی خو دولتي چارواکو څه نه دي ویلي.
