(کابل ټکی کام، ۱۳۹۷، تله ۲)
د هلمند ولايتي چارواکي وايي، نن سهار د مشرانو جرګې د غړي هاشم الکوزي په کور وسله وال بريد شوی دی.
د هلمند د والي وياند عمر ځواک وايي، پېښه نن سهار وختي د لښکرګاه ښار په کارته لګان سيمه کې چيرته چې د نوموړي کور دی رامنځته شوې ده.
د ځواک په وينا، په بريد کې د هاشم الکوزي د کور ساتونکی ټپي شوی او نور چاته پکې زيان نه دی رسېدلی.
خو يوې امنيتي سرچينې د نه نوم نه ښودلو په شرط رسنيو ته ويلي، په پېښه کې د الکوزي د کور دوه ساتونکي ټپيان شوي دي.
تر اوسه د دغه بريد مسئولیت چا په غاړه نه دی اخيستی.
