کله چې د پخواني شوروي اتحاد عسکر په وتلو شول، نو دلته خلقیانو، پرچمیانو، کمونیستانو او شورویانو په گډه د عامو افغانانو وژلو کې نور هم چټک شول. کورونه، مسجدونه، عامهځایونه، کلي او ښارونه یې بمبارول. د شوروي اتحاد عسکر وتلو ته مجبوره شول او د ډاکټر نجیب حکومت یې یوازې په تش میدان پرېښود. هغه نجیب چې یوه قوي اردو هم ونه شو ژغورلی او د هاگ د محکمې پر ځای طالبانو په اریانا چوک کې په دار کړ.
اوس امریکایانو او د هغوی لاسپوڅو هم په ورته کړنو لاس پورې کړی. روانه اوونۍ نیوزویک مجلې لیکلي وو، چې امریکا په نومبر کې د خپلو عسکرو د وتلو مهالوېش ټاکي او په تدریجي ډول به له افغانستان خپل عسکر اوباسي. د نیوزویک په حواله، د امریکا کانگرېس راتلونکې میاشت د امریکايي عسکرو په وتلو خبرې پیلوي او تر ۲۰۲۰ز کال پورې به ټول امریکایان له افغانستانه ووځي. ټرمپ له دې وړاندې افغانستان «دوزخ» بللی او د امریکا په تاریخ کې له اوږدې جگړې یې ناهیلي ښکاره کړې وه.
که امریکایان درې کاله وروسته وځي، چې همدا نن له مخې ټول ووځي، نو یوازې څو کسان به پرې خفه وي؛ خو نور ټول ملت به له خوښۍ لارو سړکونو ته راووځي او د امریکایانو ماتې او خپله بریا به اعلان کړې. ځکه تېر اوولس کاله امریکایانو موږ ته بغیر له درد، بمبار، چاپو، وژنو، ورانۍ او خفگان نه نور هېڅ نه دي راکړي، بلکې پاتې کېدل یې ورځ تر بلې نورې پېښې هم زېږوي.
د امریکایانو سکني د کاکا زامن«صفر یو او صفر دوه» قطعو په ټول افغانستان کې د عامو خلکو په وژنه لاس پورې کړی. په ننگرهار کې یې په تېرو دوو اوونیو کې تر پنځوس ډېر ملکي وگړي شهیدان کړي، همدا تېره شپه یې د میدان وردگو په جغتو کې څو کورونه له خاورو سره برابر کړي، د کاپیسا په تگاب کې یې پر واده بمبار کړی او هماغه د ۲۰۰۳، ۲۰۰۴او ۲۰۰۵ کلونو پېښې بیا تکرارېږي، خو حکومت دغه هر څه د طالبانو په نامه تېروي او د عام هېوادوال غږ به دې فاسد نظام کې څوک نه اوري.
که د طالبانو په وژنو، بمباریو، چاپو، زندانونو، شکنجو، نیولو، ټکولو، سوځولو، بندي کولو او برېښنايي شارټونه سوله راتلی، نو اوولس کاله مخکې به چا یو ډز نه وی کړی؛ خو دغه جګړه د عقیدې ده. د یو طالب په مرگ لس نور طالبان پیداکېږي. زه داسې کورنۍ هم پېژنم، چې طالبانو سره یې راشه درشه نه کوله؛ خو اوس له مخې طالبان دي. د دغو کورنیو ډېر خپلوان شهیدان شول، پر کورونو چاپې ولوېدې، خلک بېعزته شول او له شته شتمنۍ خلاص شول. کرزي رښتیا ویل، چې باگرام او څرخيپله زندانونه د طالبانو فابریکې دي او دلته د شته بندیانو وروڼه او خپلوان هم له امریکایانو غچ اخلي او خلک په لوی لاس وسلهوال کېږي.
امریکا به حتماً یوه ورخ له افغانستانه وځي. خو اوسني لاسپوڅي به یې بیا په کومو سترگو دې ملت ته درېږي؟ تېره ورځ جرمني هغو افغانانو ته د پناه له ورکولو انکار وکړ، چې جرمني عسکرو ته یې جاسوسي کړې وه، جرمني عسکرو سره یې د ژباړن په توگه کار کړی و او د دوی په بېسونو کې یې خدمت کړی و، خو اوس دوی ټولو ته له پناه ورکولو منکر شوي دي. غلام په هر ځای او هر حالت کې غلام وي او هر څوک ترې کرکه کوي.
له هېواد سره تر ټولو لوی خیانت دادی، چې د بهرني یرغلگر په مقابل کې خپل هېوادوال ووژني، د هېواد په یرغمل کولو کې ورسره مرسته وکړې او دوی په تش لاسونو بهرنیو ته وسپارې.
اخېرت کې دغه ډول خلک د اوسنیو یرغلگرو په صفونو کې راپورته کېږي او بیا به نه ﷲﷻ او نه خپل ملت ته د سترگو پورته کولو توان لري.
