(کابل ټکی کام ۱۳۹۷ تله ۲۸)
په داسې حال کې چې د کندهار د خونړۍ پیښې د جزیاتو څیړنې لا هم نه دي بشپړې شوې او ټول اړخونه یې اوس هم مبهم ښکاري، د ولسمشر غني د ملي امنیت سلاکار حمدالله محب وایي، سر له اوسه دا نه شي ویلی چې دې برید کې پاکستان لاس درلوده.
محب ویلي، د پیښې ټول اړخونه پوښلي، طالبانو یې مسؤلیت منلی خو په پیښه هیڅ بهرنی هیواد ښکیل نه شي بللی.
د نوموړي خبرې د پاکستان پر وړاندې دحکومت په دریځ کې بدلون ښکاره کوي او د ډیورند کرښې د منلو، پاکستان ته د اغزن تار د اجازې او نورو امتیازاتو د ورکړې په اړه لګول شوي تورونه ریښتونې بڼه خپلوي.
نوموړی داسې مهال دا خبرې کوي چې د جنرال رازق پلویان د دې پیښې پړه پر امریکایانو ور اچوي او زیاتوي چې پیښه د افغان او امریکایي چارواکو تر خپل جنجال وروسته رامنځته شوې.
خو د ملي امنیت رئیس معصوم ستانکزی بیا دا څرګندونې د امریکا ضد کړیو کار بولي او زیاتوي، برید د والي یوه ساتونکي داسې مهال کړی چې امریکایي او افغان چارواکي په خپل منځ کې په ټوکو ټکالو بوخت وو.
په ورته وخت کې طالبانو د هغه بریدګر مستنده ویدیو خپره کړې چې دا برید یې ترسره کړی و.
باید وویل شي چې په دې وروستیو اشرف غني او جنرال ترمنځ سخت جنجالونه راپورته شوي و او غني هڅه کوله چې نوموړی په هر ډول چې وي له دندې لرې کړي خو له ټولو هڅو سره سره تر پایه یې دا کار ونه شو کړای.
