د سولې عالي شورا: مشورتي بورډ ناقص او د منلو نه دی
(کابل ټکی کام ۱۳۹۷ لیندۍ ۲۲)
د سولې عالي شورا وایي د جمهور رئیس غني له خوا د سولې د مشورتي بورډ اعلان چې په کې د زیاتره سیاسي ګوندونو د مشرانو او دولتي چارواکو نومونه راغلي،ناقص او د نه منلو دی.
د دغې شورا مرستیاله حبیبه سرابي وایي، په دغه بورډ کې میرمنو ته کمه ونډه ورکړل شوې چې له امله یې د یاد بورډ مشروعیت له پوښتنې سره مخ شوی دی.
نوموړې دا خبرې د میرمنو په یوه غونډه کې چې د امریکا سفیر یې هم ګډونوال وو، وکړې.
سرابي وویل، په ټول بورډ کې دوه میرمنو( صدیقه بلخي، آمینه فضلي) ته ونډه ورکړل شوې چې هغه هم نه د دولتي چارواکو له آدرسه دي، نه هم د سیاسي اپوزیسیونونو.
سرابي وویل دا ورته د منلو نه ده ځکه چې په وینا یې، میرمنې باید په هره برخه کې فعاله ونډه ولري.
د سولې عالي مشورتي بورډ تیره ورځ د امنیت شورا له آدرسه اعلان شو چې په کې ګڼ شمیر چارواکو او سیاسي جریاناتو ته ځای ورکړل شوی دی.
