(کابل ټکی کام ۱۳۹۷ لیندۍ ۲۲)
د فوټبال نړیوال فدراسیون انضباطي کمیټې په یوه بیسارې بیانیه کې ویلي، چې د افغانستان د فوټبال فدراسیون مشر یې تر دریو میاشتو د فوټبال له ملي او بین المللي فعالیتونو منعه کړی دی.
فیفا ویلي،کرام الدین کرام یې د فدراسیون د ۸۴یمې مادې پر بنسټ چې اخلاقي جرایم څیړي ،له فعالیتونو منع کړی دی.
د افغانستان لویې څارنوالۍ ویلي دا اقدام د دې په خاطر شوی څو د نوموړي په هکله ټول تورونه په ښه توګه وڅیړل شي او د دغې قضیې په برخه کې چې نړیوال غبرګونونه یې را پارولي،هر اړخیز تحقیقات وشي.
لویې څارنوالۍ هم د نوموړي په ګون د شپږو کسانو دندې ځنډولې دي.
لس ورځې وړاندې د ګارډین ورځپاڼې یو راپور خپور کړ چې د فوټبال فدراسیون په دفتر کې او د دغه فدراسیون په هغه لوبغالي کې چې نجونو په کې تمرین کاوو، له ښځینه لوبغاړو نجونو سره ناروا جنسي اړیکې نیول شوې دي.
ګارډین ته د ښځینه فوټبال لوبډلې پخوانۍ روزونکې خالده پوپلزۍ ویلي و، چې د دې قضیې په تړاو رسمي اسناد ورسره شته او که اړتیا شوه عدلي او څیړنیزو ادارو ته به یې وړاندې کړي.
د یاد ټیم ښځینه لوبغاړې دا ادعاوې بې بنسټه بولي او وایی تر دې تورونو وروسته اوس په ټولنه کې چاته له شرمه نه شي کتلی او کورنۍ یې هم د سخت شرم احساس کوي.
