نیویارک ټایمز: تیره اونۍ ۱۵۲ تنه افغان سرتیري وژل شوي

(کابل ټکی کام ۱۳۹۷ لیندۍ ۲۳)

نیویارک ټایمز ورځپاڼې د تیرې اونۍ د افغان ځواکونو د مرګ ژوبلې تلفات رسنیز کړي چې په وینا یې دا اونۍ هم د افغان ځواکونو له پاره خونړۍ وه.
ورځپاڼه وایي، پر دې سربیره چې په افغانستان کې سخت ژمی پیل شوی دی خو د تیر په خلاف جګړې لا هم ګرمې روانې دي.
د نیویارک ټایمز د راپور له مخې، په تیرو اوو ورځو کې ۱۵۲ تنه افغان ځواکونه د طالبانو په بریدونو کې وژل شوي او لسګونه نور ټپیان دي.
ورځپاڼه زیاتوي، طالبانو د هیواد په لویدیځ کې زیات پرمختګونه کړي، ګڼې پوستې یې نیولې او پراخ مهمات یې لاس ته ورغلي دي.
د ورځپاڼې په باور حکومت په هر ځای کي شاتګ کړی او زیاتي سیمې یې له لاسه ورکړي دي.