کندهار: داخلي بريد کې شپږ عسکر وژل دي
(کابل ټکی کام، ۱۳۹۷، لیندۍ ۲۴)
د کندهار ولايت په ميوند ولسوالۍ کې د يوه داخلي برید په ترڅ کې د یوې پوستې شپږ پوليس وژل شوي او بریدګر طالبانو ته ورغلي دي.
پېښه نن سهار د يادې ولسوالۍ مربوط د خاک چوپان په سيمه کې رامنځته شوې ده.
طالب وياند يوسف احمدي وايي، دغه بريد د دوی د دوو تنو “نفوذي” کسانو له خوا ترسره شوی چې شپږ پوليس يې ځای پر ځای وژلي او يو بل ټپي شوی دی.
نوموړی وايي، نفوذي بريدګرو له ځان سره د وژل شويو عسکرو شپږ ميله وسلې راوړي او طالبانو سره يوځای شوي دي.
تر اوسه په دې اړه د دغه ولايت چارواکو څه نه دي ويلي، خو تر دې مخکې هم طالبانو ورته ډول بريدونه ترسره کړي چې پکې د ملي اردو، کومانډو، اربکيانو تر څنګ لوړپوړي چارواکي هم په نښه شوي دي.
شاوخوا دوه مياشتې مخکې د طالبانو يوه نفوذي کس د ولايت په مقام کې د بهرنيانو او داخلي چارواکو پر يوې غونډې بريد وکړ چې په ترڅ کې يې د کندهار د امنيه قومندان جنرال رازق، د ملي امنيت د رئیس په شمول څو تنه چارواکي ووژل شول او د والي ويسا او د کندهار لپاره د امريکايي ځواکونو قومندان په شمول څو تنه نور ټپيان شول.
همدارنګه طالب وياند يوسف احمدي د دغه ولایت په درې ولسواليو کې د چاودنو او بريد خبر ورکړی زياتوي د تيرو څلورويشتو ساعتونو په موده کې طالبانو د خاکريز په شاغونډان سيه کې يوه پوسته نيولې چې په ترڅ کې يې لس عسکر وژل شوي، په میوند ولسوالۍ کې د حامداغا قرارګاه ته څيرمه په رینجر موټر چاودنه کې “قومندان امر حمزه” او عسکر يې وژل شوي، په خبره يې د يادې ولسوالۍ په (بند تيمور او حاجي خيلو) سيمه کې د عملياتي قوې دوه ټانګونه په چاودنو کې ويجاړ شوي او پکې ګڼ شمير عسکرو ته مرګ ژوبله اوښتې ده.
