(کابل ټکی کام ۱۳۹۷ لیندۍ ۲۴)
د بغلان ولایت ځایي چارواکی وایی، درۍ تنه هغه قصابان یې نیولي چې پر امنیتي ځواکونو یې حرامې غوښې پلورلې.
د دغه ولایت د امنيه قوماندانۍ سرپرست وياند صميم جويا وایي، یادو کسانو له کلونو راهیسې د خرو او آسانو غوښې پر امنیتي سرتیرو پلورلې او تیره ورځ نیول شوي چې په وینا یې دریو واړو پر خپل جرم اعتراف هم کړی دی.
په شمال کې د ۲۰۹ شاهین قول اردو وياند جګړن محمد حنيف رضايي بیا دا ردوي چې ګواکې پر امنیتي ځواکونو دې حرامې غوښې پلورل شوې وي،ځکه د نوموړي په وینا، چې دوی د قصابانو لپاره ځانګړي څارونکي ګمارلي چې د هغوی تر نظارت لاندې حلاله کوي او بیا یې پر پوستو ویشي.
خو نیول شویو قصابانو بیا اعتراف کړی چې دوی له دو کلونو راپه دې خوا د امنیتي ځواکونو قراردادیان و، چې تیره ورځ د خرو د غوښو پر پلور نیول شوي دي.
پژواک د خپلو سرچینو په حواله وایي، د لطف الله او عطا په نوم دوه تنه نيول شوي قصابان له دوه کالو راهيسې د مرکزي بغلان ولسوالۍ ملي پوليسو ته د غوښې برابروونکي قرارداديان دي چې له ډیر وخت را په دې خوا یې افغان امنیتي ځواکونو ته حرامې غوښې لیږلې دي.
دا لومړی ځل نه دی چې د افغان امنیتي ځواکونو قراردادي قصابان د حرامو غوښو پر پلور نیول کیږي،تر دې وړاندې په ځلونو ورته پیښې شوې او قصابانو د کلونو لپاره په مختلفو ولایتونو کې پر امنیتي ځواکونو د خرو ،سپیو او آسانو غوښې خوړلې دي ،چې وروستۍ پیښه هم څه موده وړاندې په بلخ ولایت کې وه، چې څو کسه قصابان پر پوليسو د حرامو غوښو خرڅولو په تور نيول شوي وو
