(کابل ټکی کام ۱۳۹۷ لیندۍ ۲۶)
د افغانستان د ښځینه فوټبال پخوانۍ روزونکې خالده پوپلزۍ وایي،ټول هغه اسناد او شواهد یې لویې څارنوالۍ ته سپارلي چې په کې د ښځینه فوټبالرانو جنسي ځورونې په ډاګه شوې دي.
نوموړې ویلي ، د جنسي ځورونو دا ویډیو ګانې په پلازمینه کابل او اُردن هیواد کې کې چې یادو نجونو په کې تمرینونه کول، ثبت شوې دي.
پوپلزۍ وایي، په ویډیوګانو کې ښوودل کیږي جې د فوټبال فدراسیون مشر کرام الدین کرام او ځینې روزونکي له یو شمیر نجونو سره ناوړه جنسي حرکات ترسره کوي.
نوموړې زیاتوي چې لویې څارنوالۍ ترې غوښتي وو، پر ښځینه لوبغاړو د لګیدلو تورونو په تړاو خپل اسناد ورته وسپاري.
په ورته وخت کې د لویې څارنوالۍ ویاندجمشید رسولي وایي چې څارنوالۍ تر اوسه د فدراسیون له مشر او پنځلسو کسانو تحقیقات کړي او دا لړۍ لا روانه ده.
نوموړي ونه ویل چې څیړنې به یې کله بشپړیږي خو په وینا یې چې ښایی دا چاره وخت ونیسي.
شاوخوا دوه اونۍ وړاندې د بریتانیا ګارډین ورځپاڼې د پخوانۍ روزونکې “خالده پوپلزۍ“ په حواله خبر خپور کړ چې ګواکې د یاد فدراسیون پر ډیری ښځینه لوبغاړو جنسي تیري شوي، چې د فوټبال د نړیوال فدراسیون “فیفا“ د اردُن هیواد د چارواکو، د افغان ولسمشر او ګڼو لوریو غبرګونونه یې را وپارول.
لویې څارنوالۍ په دې هکله د تحقیقاتو خبر ورکړی خو فیفا بیا د فدراسیون مشر د فوټبال له ملي او بین المللي فعالیتونو تر دریو میاشتو منع کړی دی.
