فارياب: د کومانډو ځواکونو قومندان په شمول لس عسکر وژل شوي دي

(کابل ټکی کام، ۱۳۹۷، لیندۍ ۲۷)

د فارياب ولايت په ګرزيوان ولسوالۍ کې د دولتي ځواکونو او طالبانو تر منځ نښتې شوي چې دواړه غاړې يوبل ته د تلفاتو اړولو ادعا کوي.

د دفاع وزارت وايي، په خواجه سبزپوش او دولت اباد ولسواليو کې د عملیاتو پر مهال اتلس وسله وال وژل شوي او اته تنه نور ټپيان دي.

له بله پلوه طالبان وايي، په ګرزيوان ولسوالۍ مربوط د دولتي ځواکونو هغه بريدونه چې د بهارک په سیمه کې يې ترسره کړل د طالبانو له سخت غبرګون سره مخ شول.

طالبانو کابل ټکی کام ته په رالېږلې خبرپاڼه کې ويلي، دغه نښتې د شپې له يوې بجې پيل او تر سهار پنځو بجو پورې روانې وې چې په ترڅ کې يې لس د کومانډو ځواکونو د يوه مهم قومندان (عبدالخبير پنجشيري) په شمول لس کومانډويان ووژل شول چې د پنځو تنو جسدونه يې په ميدان پاتې شوي دي.

خبرپاڼه زياتوي، له سهار سم پاتې عملياتي عسکر له سيمې په شاه شوي او طالبانو ته د وژل شويو عسکرو دوه د شپې دوربينونه، دوه ميله وسلې او په زياته اندازه مهمات لاسته ورغلي دي.

خبرپاڼه کې راغلي، په ياده ټوله جګړه کې درې تنه طالبان هم ټپيان شوي دي.