(کابل ټکی کام ۱۳۹۷ لیندۍ ۲۸)
د افغانستان د مالیې وزارت چارواکي وایي، په پام کې لري څو د لوړ رتبه مامورینو تنخواوې را کمې او د ټیټ پوړو کارمندانو په معاشاتو کې زیاتوالی راولي.
د دغه وزارت ویاند شمروز خان مسجدي رسنیو ته ویلي ، حکومتي مشرانو ورڅخه د داسې طرحې غوښتنه کړې چې د ټیټ پوړو کارمندانو معاشاتو کې دې د زیاتوالي تر څنګ د لوړ رتبه چارواکو معاشات را کنترول کړي.
نوموړی ویلي، اوسمهال د ۸۰ سلنه ټیټ پوړو کارمندانو معاشات یواځې شل سلنه لوړ پوړي چارواکي تر لاسه کوي.
مسجدي وایي ،د اجیرانو، موټر چلوونکو او د دفترونو د صفاکارانو معاش له شپږو تر ۷ زرو افغانیو دی، په داسې حال کې چې چارواکي بیا سلګونه زره افغانۍ معاش اخلي.
د نوموړي په وینا، د دې کسانو معاشات به تر ۱۴ زره افغانیو او د ټیټ رتبه مامور معاش چې ۹ افغانۍ وې تر ۱۸ یا شل زره افغانیو پورته وي.
دغه راز به د معینانو رئیسانو چې درۍ سوه زره یا ۳۵۰۰۰۰ میاشتنۍ تنخواوې یې درلودلې، تر دوه لکه او ۲۲۰ زره افغانیو پورې را کمې کړي.
