(کابل ټکی کام، ۱۳۹۷، لیندۍ ۲۹)
په امريکا کې د سولې ملاتړي او جګړې ضد يوه بنسټ له سوريې څخه د امریکايي ځواکونو د ايستلو پريکړې هرکلی کړی دی.
دا مهال په سوريه کې دوه زره ځواکونه د جګړې لپاره ميشت دي خو تيره ورځ رويټرز اژانس د امریکايي چارواکو له قوله وليکل، چې په دغه هېواد کې داعش ډلې ماتې خوړلې، د امريکا د بهرنيو چارو وزارت کارکوونکي په څلورويشت ساعتونو کې ستنوي او تر راتلونکو درې مياشتو پورې به ټول امريکايي ځواکونه له سوريې وباسي.
په عين حال کې په امريکا کې د جګړې ضد بنسټ وايي، د امريکا پخوانيو ولسمشرانو د دغه هېواد نسلونو ته جګړه په ميراث پرېښوده خو اوس د دې وخت راغلی چې امريکايي مشران جګړه پای ته ورسوي او د سوريې ترڅنګ له افغانستان، عراق او يمن څخه هم خپل پوځيان رواباسي.
یاد بنسټ ويلي، امريکا په افغانستان کې اتلس کاله پوځي هڅو او بمباريو کې له وژلو پرته نور څه نه دي شوي او د میلياردونو ډالرو په لګښت دغه هيواد کې هيڅ بدلون نه ليدل کېږي.
د جګړې ضد بنسټ، له امريکا غوښتي چې د نړۍ په دغه حساسو شرايطو کې د پوځي اقداماتو پر ځای د سياسي حل په فکر کې شي ځکه چې په دې سره به د ملکي امريکايانو ملاتړ هم له ځان سره ولري.
تر دې مخکې هم د امریکا د سنا ځينو غړو، يو شمير امریکايي پوځي کارپوهانو او سیاستوالو له امريکايي چارواکو غوښتي چې له افغانستانه خپل پوځيان وباسي.
دغه راز طالبانو هم له امريکايي استازي خلیلزاد سره په تيرو څو ناستو کې له افغانستانه د بهرنيو ځواکونو پر وتلو بحث کړی دی.
