(کابل ټکی کام، ۱۳۹۷، لیندۍ ۲۹)
د هرات ولايت په چشت شريف ولسوالۍ کې د هاوان مرمۍ چاودېدو له کبله څلور بزګران وژل شوي دي.
د هرات د والي وياند جيلاني فرهاد وايي، چاودنه هغه مهال شوې کله چې بزګرانو په پټيو کې کار کاوه او د هاوان يوه پخوانۍ مرمۍ پرې وچاودله.
فراه وايي، د هاوان ياده مرمۍ د بخوانيو جګړو له کبله پاتې شوې چې د بزګرانو د کار پر مهال پرې چاودنه وشوه زياتوي په دغه چاودنه کې درې تنه نور بزګران ټپيان شوي هم دي.
د يادې پیښې ټپيان د چشت شريف ولسوالۍ روغتون ته وړل شوي او د ډاکټرانو په وينا روغتيايي حالت يې ښه دی.
په افغانستان کې د ۱۹۷۹کال راهيسې ښکيلو خواوو د جګړو له کبله زیات مايونونه خښ شوي چې د اټکل له مخې شمير يې (شپږ سوه څلوېښت زره) ښودل کېږي.
د ملګرو ملتونو د ماين پاکۍ افغان موسسو د معلوماتو له مخې، د افغانستان شل فيصده خاوره لاهم په ماينونو پوښلې چې په اوسط ډول د ورځې يې له کبله شپږ کسانو ته مرګ ژوبله رسيږي.
