واحد فقیري
ورځني سیاسي نوټونه (۲۹۰)
خلیلزاد په یوې تازه مرکې کي ویلي دي چي د ابوظبی په مجلس کي په افغانستان کي د امریکا د نظامي اډو او پر یوه درې میاشتني اور بند باندي خبري وسوې. خلیلزاد د طلوع نیوز او اریانا ټیلویزیون سره په مرکه کي وویل که څه هم طالبانو د افغان حکومت له استازو سره و نه کتل، خو په خبرو کي پرمختګ وسو. خلیلزاد علاوه کړه،«له بده مرغه، طالبانو موافقه و نه کړه چي د افغان هیات سره وګوري، او زما په نظر دا یو غلط تصمیم وو، او ښکېلو طرفونو ته ئې یو منفي احساس ورکړ.»
نیویارک ټایمز د ډسمبر پر ۲۰ مه لیکي د ابوظبی په مجلس کي طالبان پر خپل پخواني موقف باندي کلک ولاړ ول، او ویل ئې چي تر هغه وخته پوري به د افغان حکومت سره خبري و نه کړي تر څو د متحده ایالاتو سره یوې عمومي موافقې ته نه وي رسېدلي.
خلیلزاد وویل،«طالبانو موږ ته وویل چي هغوی غواړي لومړی زموږ سره پر امنیتي مسایلو باندي خبري وکړي، او بیا به د افغان اړخ سره پر سیاسي مسایلو باندي وږغېږي.»
خلیلزاد وویل د ابوظبی په غونډه کي عرب ګډون کونکو د درې میاشتني اور بند وړانديز وکړ څو د دې اور بند په جریان کي پر مهمو مسایلو باندي خبري وسي. خو طالب چارواکو وویل چي دوی د دې تصمیم صلاحیت نه لري، او باید همدا خبره تر خپلو مشرانو پوري ورسوي. خلیلزاد وویل پدې خبرو کي د طالبانو سره کرښه له افغانستانه د خارجي قواوو د وتلو موافقه وه. او د متحده ایالاتو سره کرښه دا وه چي بیا به افغانستان د ترورسټانو اډه نه ګرځي. خلیلزاد وویل،« ما طالبانو ته وویل که چیري د تروریزم تهدید رفع سي، متحده ایالات په افغانستان کي دایمي نظامي حضور نه غواړي.»
نیویارک ټایمز لیکي پدې وروستیو وختونو کي د افغانستان جنګ جمهورریس ټرمپ بې حوصلې کړی دئ، او د چهار شبنې په ورځ ئې د خپلو جنرالان د مخالفت سره سره له سوریې څخه د امریکايي عسکرو د راایستلو فیصله وکړه. اخبار کاږي له افغانستانه د امریکايي عسکرو د راایستلو په برخه کي د ټرمپ عجله پر اشرف غني باندي منفي اثر کړی دئ، ځکه غني – عبدالله ګومان کوي چي پدې خبرو کي بای پاس سوي دي.
تېره ورځ، کله چي خلیلزاد اشرف غني ته د ابوظبی د مجلس په اړه ګزارش ورکاوه، د افغانستان د ملي امنیت مشاور، حمد الله محب، په ټویټر کي څو پر له پسې ټویټه وکړه. هغه لیکي ول،«د یو مستقل هیواد په توګه، هیڅ ملک او یا فرد د دې حق او صلاحیت نه لري چي د افغانستان لپاره د نوي حکومت پر جوړښت او ساختار باندي داسي خبري وکړي چي د افغان له اساسي قانون سره په ټکر کي وي.» محب علاوه کوي،«د افغانستان د مستقبل په باب فیصله کول یوازي د افغانانو او د هغوی د منتخبو مشرانو صلاحیت دئ. د یوه منتخب حکومت لپاره بل هیڅ بدیل نسته. د افغانانو د قربانیو پر سر به هیڅ ډول معامله و نه سي.»
خلیلزاد په جواب کي وویل،«د ابوظبی په خبرو کي د افغانستان د آینده سیاسي جوړښت په باب خبري و نه سوې، د مثال په توګه موقتي حکومت. دا هغه مسایل دي چي افغانان ئې باید پخپلو مینځ کي سره فیصله کړي.»
Taliban Talks Covered Fate of U.S. Military Presence in Afghanistan, Envoy Says
ـــــــــــــ
واحد فقیري په کال ۱۹۶۲ کي په کندهار کي زېږېدلی دی. په کال ۱۹۸۰ کې د کندهار د احمد شاه بابا له لېسې څخه فارغ شوی دی. عالي تحصیلات یې په متحده ایالاتو کي کړي دي، او د امریکن پوهنتون او جورج مېسن پوهنتون څخه په سیاسي علومو کي درې ډیګرۍ لري. څو کاله یې د امریکا ږغ سره د خبریال په توګه کار کړی دی. څو کاله یې د پښتو د ژبي په برخه کي استادي کړې ده. درې کتابونه یې په پښتو ترجمه کړي دي. اوس د څو راډیوګانو او تیلویزیونو سره د سیاسي مبصر په توګه همکاري کوي. او وخت نا وخت یې سیاسي تبصرې د افغانانو په مختلفو ویب سایټونو کي خپرېږي.
