کابل.کام – د لېندۍ ۳۰مه، ۱۳۹۷:
له افغانستانه د نیمايي امریکايي سرتېرو د احتمالي خروج د خبرونو تر خپرېدو وروسته، حکومت او په ځانګړې توګه دولتي ځواکونه له وارخطايۍ سره مخ دي.
که څه هم د دې راپورونو تر خپرېدو وروسته، د ولسمشرۍ ماڼۍ یوه ویاند، هارون چخانسوري، خپلو ځواکونو ته د ډاډ ورکولو لپاره وویل چې له افغانستانه د نیمايي امریکايي عسکرو وتل به پر امنیتي حالت ”هیڅ اغېز ونکړي“، خو پخپله حکومت، د جګړې ډګر کې پراته او جګړه کې ګډون کوونکي دولتي عسکر له وارخطايۍ سره مخ دي.
د هېواد په شمال شرق کې د دولتي کمانډو ځواکونو د لسم پامیر کنډک قومندان، جګړن محمد علي احمدي، امریکایۍ نیویارک ټایمز ورځپاڼې ته ویلي چې که امریکایي ځواکونه دوی یواځې پرېږدي، ناوړه پایلې به ولري. د نوموړي په خبره، ”که [امریکايي] ځواکونه له دې ځایه ولاړ شي او موږ یواځې پرېږدي، دا به موږ ته یو خطرناک ګوزار وي او ډیرې منفي پایلې به ولري.“
ښاغلی احمدي د امریکايي ځواکونو وتل ”مناسب“ نه بولي او زیاته کړې یې ده، ”موږ له سیمو، او په ځانګړې توګه هلته چې امنیتي ځواکونه له سختو ګواښونو سره مخ دي، د دفاع پوره ظرفیت نه لرو.“
نن، جمعه د لېندۍ ۳۰مه، امریکايي رسنیو د چارواکو له خولې راپورونه خپاره کړل چې له افغانستانه تر اووو زرو زیات امریکايي عسکر د ټرمپ په امر وځي. د امریکا دفاع وزارت او په افغانستان کې مېشتو امریکايي ځواکونو په دې اړه څه نه دي ویلي.
په افغانستان کې اوسمهال نږدې ۱۴۰۰۰ امریکايي عسکر مېشت دي، چې زیاتره یې د ناټو د غوڅ ملاتړ ماموریت په چوکاټ کې کورنیو دولتي ځواکونو ته مرسته، روزنه او مشورې ورکوي. خو په دې وروستیو کې د طالبانو د نفوذي بریدونو له امله د روزنې او سلاکارۍ دا پروسه هم له ځنډ او خنډ سره مخ شوې ده.
”وارخطايي او بېخبري“:
امریکایۍ نیویارک ټایمز ورځپاڼې لیکلي، له افغانستانه د امریکايي عسکرو د راایستل کېدو اعلان د افغانستان حکومت، ګاونډي هېوادونه او نور ډیپلوماټان حیران کړي ځکه دا مهمه پرېکړه ناببره شوې ده.
همداراز، رویټرز خبري اژانس لیکلي، په کابل کي د لوېدیځو هېوادونو ډیپلوماټان وايي چي ټرمپ د هغوی له حکومتونو سره د دې مهمي پرېکړې په اړه هیڅ مشوره نه ده کړې.
له افغانستانه د امریکايي ځواکونو د ایستل کېدو راپورونه داسې مهال خپريږي چې تر دې یوه ورځ وړاندې د امریکا ولسمشر، ډونلډ ټرمپ، له سوریې د ټولو امریکايي عسکرو د ایستلو اعلان وکړ او امریکا له طالبانو سره په مخامخ خبرو بوخته ده. د یادونې وړ ده، له افغانستانه د امریکايي ځواکونو وتل د سولې د خبرو لپاره د طالبانو سره کرښه یا لومړنی شرط دی.
