(کابل ټکی کام ۱۳۹۷ مرغومی ۱)
د سولې عالي شورا وایي، هیله مند دي چې تر راتلونکو څو میاشتو پورې به طالبان او د ملي یووالي حکومت تر منځ مخامخ ناسته وشي.
د دغې شورا ویاند احسان طاهري یک تلویزیون ته ویلي، په ابوظبۍ کې د حکومت مرکچي پلاوي ته د طالبانو پام نه کول عادي خبره ده او زیاتوي، چې د روغې جوړې د خبرو په پیل کې خامخا ځینې خفګانونه وي چې وروسته حل کیږي.
طاهري زیاتوي، امید شته چې د طالبانو استازي به تر راتلونکو څو میاشتو پورې له دولتي چارواکو سره ګډې ناستې وکړي.
د سولې عالي شورا وروسته تر هغه دا هیله څرګندوي چې څو ورځې وړاندې په ابو ظبۍ کې د طالبانو او امریکایی چارواکو ترمنځ ګډه غونډه وشوه چې په کې طالبانو افغان مرکچي پلاوي ته هیڅ اعتناء ونه کړه او د راپورونو له مخې افغان پلاوي د خبرو اترو له ردولو وروسته وړاندیز کړی و، چې که طالبان له دوی سره خبرو ته حاضر نه وي، په یو ځای دې ډوډۍ وروسره وخوري، خو طالبانو له هغوی سره له یوځای ډوډۍ خوړلو هم انکار وکړ.
طالبانو ویلي چې د افغانستان ستونزه دوه اړخونه لري کورنی او بهرنی چې لومړی باید بهرني حل شي او وروسته بیا کورني اړخ باندې خبرو او تفاهم ته حاضر دي
