(کابل ټکی کام ۱۳۹۷ مرغومی ۷)
راپورونه وایي، تیره شپه د هرات ولایت د غوریان ولسوالۍ په مرکز کې یو رادیویي استیشن او یو تلویزیوني چینل د طالبانو تر برید لاندې راغلي.
سرچینې وایي د “سیماغوریان“ په نامه د فحش فلمونو خپروندیه تلویزیوني چینل او د “صبح“ په نامه یو رادیویي استیشن چې غیر اخلاقي نشرات یې درلودل، له منځه وړل شوي دي.
طالبانو د برید پړه منلې او ویلي یې دي چې دواړه استیشنونه د حکومت اړوند وو چې د غیر اخلاقي نشراتو له امله په بشپړ ډول ویجاړ شوي دي.
د یادونې وړ ده چې طالبانو په خپلو اعلامیو کې د بیان آزادي ته اهمیت ورکړی خو له هغو صوتي، انځوریزو او انلاین رسنیو یې چې غیر اخلاقي نشرات کوي او ټولنه د بې حیایي پر لوري را کاږي، په بار بار غوښتنه کړې چې باید خپلې خپرونې له اسلامي او افغاني عقیدې او کلتور سره برابرې کړي.
باید وویل شي چې د هیواد په پلازمینه کابل کې لا هم داسې خصوصي رسنۍ شته چې داسې سریالونه او خپرونې نشروي؛ چې له افغاني او اسلامي عنعناتو او عقایدو سره هیڅ ډول اړخ نه لګوي او د ولسونو د غوښتنو سربیره یې بیا هم د بیان د آزادۍ ریښتینی اصل تر پښو لاندې کړی دی.
