(کابل ټکی کام، ۱۳۹۷، مرغومی ۹)
د کرکټ نړيوال جام “کپ” چې د تيرې چهارشنبې په ورځ د مرغومې مياشتې په پنځمه نيټه له متحده عربي اماراتو افغانستان ته راوړل شوی و د شنبې په ورځ بيرته اماراتو ته ولېږدول شو.
د افغانستان کرکټ بورډ وايي، د کرکټ نړيوال جام په لومړۍ ورځ په کابل کې ولسمشرۍ ماڼۍ، دالامان ماڼۍ او دغه راز ملي تلويزيون ته د دندارې لپاره وړل شوی و.
په دویمه ورځ یې د بامیانو تاریخي ولایت کوربه توب وکړ چې په دغه ولایت کې د غلغلې هوټل او بودا بت سیمې ته يوړل شو او په درېيمه ورځ بيا هرات او کندهار ولايتونو ته ولېږدول شو.
د کرکټ بورډ خبرپاڼه کې راغلي، چې د ۲۰۱۹م کال نړيوال جام د يادو ولايتونو په تاریخي ځآيونو کې نندارې ته وړاندې شو چې د جام ترڅنګ هېوادوالو د ملي لوبغاړو هم تود هرکلی وکړ.
د نړيوال جام د بيرته لېږدولو په مراسمو کې د کرکټ بورډ اجرائيوي رئيس شفيق الله ستانکزي د ۲۰۱۸م کال د کرکټ په لاسته راوړنو خوښي وښوده او زياته يې کړه چې افغان کرکټ نړيوال حيران کړي چې لويه لاسته راوړنه يې دا ده چې (نن افغانستان په شل اوریزو لوبو کې اتم او په یو ورځنیو لوبو کې ۱۰ مقام لري، او نړيواله شورا مو دې ته اماده کړه چې دغه کپ افغانستان ته راوليږي).
کرکټ بورډ وايي، د دغه کپ په راوړلو شاوخوا (۶۰زره) ډالره لګښت راغلی چې ټول د کرکټ بورډ د بوديجي له خوا ورکول کېږي.
دا دوهم ځل دی چې افغانستان ته د کرکټ نړيوال کپ راوړل کېږي تر دې مخکې په ۲۰۱۴م کال کې هم افغانستان د نړيوال کپ کوربه و.
د ۲۰۱۹کال نړيوال جام سيالۍ به د مۍ مياشتې په دېرشمه نيټه پيلېږي او د جولای مياشتې تر څوارلسمې به دوام وکړي.
په دغه سياليو کې لس ټيمونه برخه لري چې افغانستان يې هم په ډله کې دی.
