(کابل ټکی کام، ۱۳۹۷، مرغومی ۹)
د ټاکنو خپلواک کمېسيون باوري سرچينو رسنيو ته ويلي، د ولسمشريزو ټاکنو د ځنډ پر سر د حکومت او بهرنيانو تر منځ اختلاف رامنځته شوی دی.
ټاکل شوې وه، چې د ټاکنو کمېسيون پرون د شنبې په ورځ په يوه خبري کنفرانس کې د ولسمشريزو ټاکنو د ځنډولو اعلان او دقيقه نيټه معلومه کړي خو د دواړو غاړو تر منځ اختلاف د دې لامل شوی چې دغه اعلان وروسته شي.
سرچينې ويلي، حکومت تر درېيو مياشتو د ولسمشريزو ټاکنو ځنډولو سره توافق ښودلی خو امريکايان او بهرني مرستندويان غواړي چې دغه نيټه تر شپږو مياشتو وغځوي.
تيره ورځ د ازادو او عادلانه ټاکنو د بنسټ اجرائيوي مشر يوسف رشید ويلي و چې ولسشمريزې ټاکنې ځکه په خپل وخت نه ترسره کېږي چې تر اوسه ورته هيڅ امادګي نه ده نيول شوې او نړيواله ټوله غواړي چې د ولسي جرګې ټاکنو غوندې ولسمشريزو ټاکنو کې تيروتنې ونه شي او په دغه کمېسيون کې د اصلاحاتو غوښتونکي دي.
دغه راز بهرنيو مرستندویانود ولسشمريزو ټاکنو لپاره د کمېسیون د بودجې طرحه رد کړې او د ټاکنو لپاره یې له مرستې ورکولو انکار کړی دی.
د ټاکنو خپلواک کمېسیون مرستیال ویاند میرزامحمد حقپرست وايي: “د ټاکنو خپلواک کمېسیون د بودجې طرحه برابره کړه او له نړیوالې ټولنې سره یې شریکه کړه خو د نړیوالې ټولنې له خوا کمېسیون ته مثبت ځواب ونه ویل شو”.
په عين حال کې د دغه کمېسيون د مرستيال وياند ذبیح سادات بيا وايي، له سياسي ګوندونو، مشرانو او بنسټونو سره بحثونه پيل شوي او تر دوو درېيو ورځو پورې به معلومه شي چې ټاکنې د څه لپاره او څومره وخت ځنډيږي.
تر دې مخکې يو شمير سياسي ګوندونو او سياسيونو د ولسمشرۍ ټاکنو ځنډولو سره مخالفت څرګند کړی دی خو د شنونکو په باور ښايي ولسشمريزو ټاکنو اعلان د امریکا او طالبانو تر وروستيو خبرو پايلو پورې وځنډول شي.
