(کابل ټکی کام، ۱۳۹۷، مرغومی ۹)
د بغلان ولايتي شورا رئيس محمد صفدر محسني وايي، له تيرو لسو ورځو راهيسې غير مسووله وسله والو پلحصار ولسوالۍ نيولې، ولسوال او امنيه قومندان يې ترې شړلي دي.
د محسني په وينا، په پلحصار ولسوالۍ کې د دولت هيڅ حاکميت نه شته، د يادو وسله والو پر وړاندې حکومتي ځواکونه ناتوانه دي او هغوی پر خلکو ظلمونه پيل کړي دي.
نوموړی زياتوي، غير مسووله وسله والو تر اوسه په نوبهار سيمه کې یو تن وژلی او د عامو خلکو يو کور يې هم سوځولی دی په خبره يې (لس ورځې مخکې د دوو غير مسووله وسله والو ډلو تر منځ د پخوانۍ دښمنۍ له کبله نښته پيل شوه چې لا هم روانه ده).
د پلحصار اوسېدونکي وايي، د غير مسووله وسله والو له ظلمونو تر پوځې راغلي او دولتي ځواکونه هم د هغوی د ناقانونه کړنو په مخنیوي کې پاتې راغلي زياتوي له تيرو لس ورځو راهيسې د درنو او سپکو وسلو جګړه روانه ده خو حکومت يې په اړه هيڅ اقدام نه کوي.
له بله پلوه د بغلان د امنيې قوماندانۍ وياند اکرام الدين سريع هم مني چې په سيمه کې نا امني شته خو په وينا يې د غير مسووله وسله والو پر وړاندې به ډير ژر عمليات پيل شي.
دا لومړی ځل نه دی چې غير مسووله وسله وال دولتي چارواکي له ولسوالۍ شړي بلکې تر دې مخکې هم په شمال کې ځينو چارواکو پورې تړليو مليشو- قومندانانو له دولتي ځواکونو سره نښتې کړي چې څو بېلګې يې د نظام الدين قيصاري او څو خپلسرو قومندانانو دی چې د حکومتي سرتيرو سره يې جګړې هم وکړې او بغیر له محاکمه کولو خوشې شول.
