سرليکنه
په افغانستان کې جګړه د بهرنيو يرغلګرو او د هغوی د مزدورانو له وحشته پیل شوې ده. د روسي مزدورانو د يرغل زخمونه لا روغ شوي نه وو چې د امريکايي يرغلګرو په يرغل سره بله جګړه پیل شوه او دا دی تراوسه پورې روانه ده.
افغانان مېړني دي، خو د مېړنيو تر څنګ بيا داسي وطن-پلوري هم پکې شته چې تل یې د بهرنیو یرغلګرو یرغل ته لاره هواره کړې او په څنګ کې ورسره درېدلي دي.
په تېرو ١٧ کلونو کې افغانانو په پوره مېړانه هم د يرغلګرو او هم د هغوی له مزدورانو سره جګړه وکړه، او لا روانه ده. خو دا جګړه چې په کوم قدم پیل شوې، د هغه قدم په پای به پای ته رسيږي. يانې، بهرنيو پوځونو پر افغانستان يرغل کړی، او تر څو چې بهرني پوځونه له افغانستانه وتلې نه وي، جګړه به روانه وي.
غربي رسنۍ او امريکايي جنرالان وايي چې په افغانستان کې د جګړې دوام په طالبانو پورې اړه لري؛ که طالبان جګړه کوي، دوې به هم ورسره په جګړه بوخت وي. دلته امريکايي جنرلان پخپله په دې ښه پوهيږي چې يرغل مو هم د ټولو نړيوالو اصولو پر خلاف او وينا مو هم د نړيوالو اصولو پر خلاف ده. که طالبان په افغانستان کې جګړه کوي هغوی یې له خپلې خاورې او ولسه د دفاع لپاره کوي، د يرغل په مقابل کې جګړه کوي. امريکايي جنرالان په افغانستان کې د جګړې څه ځواب لري او د څه لپاره جنګيږي؟
٢٠١٨ز کال د بهرنيو پوځونو لپاره يو ښه فرصت ؤ چې له افغانستانه یې پښې سپکې کړې وای. خو دا چې ونه وتل، جګړه به همداسې روانه وي. په افغانستان کې د امريکايي پوځونو قومندانان بايد په دې ښه پوه شي چې افغانان به د وروستي بهرني پوځي تر موجوديته پورې د تېرو ۱۷ کلونو په شان په لوړه روحیه جنګيږي.
په افغانستان کې د امريکايي پوځونو حضور يواځې افغانستان ته نه، بلکې د سيمې د هېوادونو لپاره هم ستر خطر دى. چين ويلي، امريکا دې له افغانستانه خپل پوځونه په مسئولانه توګه وباسي. له دې دا څرګنده شوه چې چين هم د روسیې، ایران، پاکستان او نورو هېوادونو په څېر نه غواړي چې امريکايي پوځونه دې په افغانستان کې پاتې او سيمه دې له خطر سره مخ وي.
امريکايي پوځونو په تېرو ١٧ کلونو کې پر افغان ولس د ظلم او وحشت چپه مېچنې وګرځولې. خپل وحشت ته یې تر اخیري حده دوام ورکړ، خو بيا یې هم د افغانانو د مقاومت مخه ونه نیولای شوه.
امريکا تراوسه پورې په افغانستان کې د جګړې په نوم جګړه کوله. تر دې وروسته به د سولې په نوم جګړه کوي او افغانان په پکې وژني. دا لا نه ده څرګنده چې د سولې په نوم دا جګړه به یې تر کومه دوام لري. خو که امريکايي جنرالان په يرغل سره جګړې ته دوام ورکوي، افغان ولس اړ دی چې په خپله دفاع کې د وروستي يرغلګر تر وتلو پورې جګړه وکړي – دا یوه فریضه ده او افغانان د دې فریضې په پوره کولو کې ډېر ویاړلی تاریخ لري.
