(کابل ټکی کام ۱۳۹۷ مرغومی ۱۳)
تر لس کلن ځنډ وروسته حکومت مجبور شو چې د بغلان ولایت د سیمنټو د تر ټولو سترې فابریکې “سیمنټ غوري“ مالکیت پر خپله غاړه واخلي.
د سوداګرۍ وزارت وایی،لس کال وړاندې یې د یادې فابریکې قراداد یوې خصوصي کمپنۍ“افغان انوستمنت“ ته پر دې شرط ورکړ چې هره ورځ به ۱۴۰۰ ټنه سیمنټ تولیدوي او په یاده سیمه کې به ۱۴۰ میلیونه ډالره پانګه اچونه کوي؛ خو یاد شرکت د اصولو خلاف هره ورځ یواځې څلورسوه ټنه سیمنټ تولیدول او هیڅ پانګه اچونه یې نه ده ترسره کړې.
د افغان انوسمینټ فابریکې مسؤلین وایي، د سوداګرۍ وزارت چارواکو ورسره ناوړه چلند کړی او له دې پرته چې حساب ورسره تصفیه کړي، کارمندان یې په زور یې له شرکت څخه ایستلي دي.
بلخوا بیا د سوداګرۍ وزارت ویاندعبدالقدیر مصطفی وایي، شپږمیاشتې وړاندې اقتصادي شورا پریکړه کړې چې باید له یاد شرکت سره قراداد لغوه شي او شرکت ته یې په دې هکله له وړاندې خبر ورکړی وو.
نوموړي دغه راز وویل، د بغلان ولایت ته یې یوپلاوی ټاکلی چې هلته لاړ او له یاد شرکت سره خپل حسابات تصفیه کړي.
