(کابل ټکی کام، ۱۳۹۷، مرغومی ۱۳)
د سرپل چارواکي او د ولايتي شورا غړي وايي، چې په دغه ولايت کې طالبانو حملې زياتې کړي، که مرسته ونه شي ښايي ډير ژر د طالبانو لاسته ولويږي.
د سرپل د ولايتي شورا غړی حسين مجاهدزاده په دغه ولايت کې د طالبانو پر خلاف د عملیاتو غوښتنه وکړه زياتوي که د هغوی مخه ونه نيول شي نو دغه لايت به د حکومت له لاسه ووځي.
د سرپل د والي وياند ذبیح الله اماني بيا وايي، طالبانو د مرکز په شمول، په صياد، سوزمه قلعه او سانچارک ولسواليو کې د عملياتو پلان درلود خو د هوا د خرابوالي له امله يې دغه عمليات ځنډېدلي دي.
د اماني په وینا، طالبان د ډله ايزو بريدونو پلان لري او که بيړنۍ مرسته ونه شي دغه ولايت يې له ګوتو په وتو دی.
دغه راز نوموړی وايي، سیمه ییز ځواکونه له طالبانو څخه د سیمو د بېرته نیولو توان نلري او که حالت همداسې دوام پیدا کړي، ډیر ژر به جګړه د ولایت مرکز ته ورسېږي په خبره يې وړمه ورځ هم طالبانو د صياد ولسوالۍ په قشقري سيمه کې بريدونه وکړل چې په ترڅ کې يې شپږويشت عسکر ووژل شول او لسګونه نور ټپيان شول.
سرپل ولایت شپږ ولسوالۍ لري چې یوه ولسوالۍ (کوهستانات) په بشپړه توګه د طالبانو سره ده او د دغه ولايت زياتې سيمې يې هم تر واک لاندې دي چې د مرکز په شمول په ټول ولايت کې وسله وال فعالیتونه کوي.
