د چک جمهوریت : که امریکایان ووتل؛ مونږ هم نه پاتې کیږو
(کابل ټکی کام ۱۳۹۷ سلواغه ۲۰)
د چک جمهوریت چارواکي خبرداری ورکوي چې له افغانستان څخه د امریکایي ځواکونو وتل به زیاتې ستونزې راولاړې کړي.
د دغه هیواد د دفاع وزیر لوبر متنار وایي، که امریکا له افغانستان څخه پښې سپکې کړې، دوی به هم په ورته اقدام لاس پورې کړي.
نوموړی په افغانستان کې د امریکایي ځواکونو حضور اړین بولي او زیاتوي ،څو چې په یاد هېواد کې د ترهګرو ګواښ په بشپړه توګه له منځه نه وي وړل شوی، د ځواکونو ایستل به ستونزې لا ډېرې کړي.
تر دې وړاندې المان هم ویلي وو، چې که د امریکایانو د وتلو لړۍ په پیلیدو شوه؛ نو هیواد به یې د امریکایي پوځیانو تر وتلو وړاندې خپل ځواکونه ورټول کړي.
ایټالیا هم ورته اقدام باندې لاس پورې کړی او د دفاع وزارت یې خپلو چارواکو ته امر کړی چې تر راتلونکي کال پورې له افغانستان نه د ځواکونو را ایستل وارزوي.
دا په داسې حال کې ده چې امریکا له طالبانو سره د خپلو ځواکونو پر وتلو یوه جوړجاړي ته نږدې شوې او هڅه کوي خپل ځواکونه په بشپړ ډول له دغه هیواده وباسي
