(کابل ټکی کام ۱۳۹۷ سلواغه ۲۵)
د کابل حکومت په پاکستان کې د طالبانو او د دغه هیواد د مشرانو تر منځ د غونډې په تړاو جدي اندیښنه څرګنده کړې او ویلي یې دي چې دغه ډول غونډې د افغانستان له ثبات سره هیڅ مرسته نه کوي.
د کابل حکومت د اجرایه ریاست ویاند امید میثم رسنیو ته ویلي، ” هیلهمند یو چې زموږ ګاونډیان او د سیمې هیوادونه له افغانستان سره دولت په دولت اړیکه ولري، که موږ له تروریستی ډلو سره اړیکه ونیوله، زه فکر کوم دا د وضعیت له ښه کیدو سره مرسته نه کوي”.
نوموړي زیاته کړې د اسلام آباد په څیر غونډې به روان وضعیت لاپسې پیچلی کړي.
دا په داسې حال کې ده چې ټاکل شوې د راتلونکې دوشنبې پر ورځ طالبان په اسلام آباد کې له امریکایي او پاکستاني چارواکو سره د دغه هیواد په رسمي غوښتنه یوه غونډه وکړي.
طالبان وایي په دغه غونډه کې به له صدراعظم عمران خان سره هم وګوري او د افغان سوداګرو او مهاجرینو پر ستونزو به ورسره بحث وکړي.
د کابل حکومت تر دې وړاندې په مسکو کې د افغان سیاسیونو او طالبانو ترمنځ خپلمنځي ناسته هم غندلې وه او سخت غبرګون یې ورته ښوودلی وو.
