(کابل ټکی کام ۱۳۹۷ سلواغه ۲۵)
په کابل کې د روسیې سفارت مرستیال نن په یوه ناسته کې وویل، مسکو طالبان د یوه سیاسي ځواک په توګه پېژني او هغه وخت را رسیدلی چې دغه ډله د ملګرو ملتونو له تور نوملړ څخه ووځي.
هغه وویل، که ملګرو ملتونو دا کار وکړ، روسیه چمتو ده چې طالب چارواکي د خپلو بندیزونو له لیست څخه وباسي.
البرت خوریف وویل، د کابل حکومت د دې پر ځای چې د مسکو له هڅو ستاینه وکړي، په لوی لاس ددغې پروسې د تخریب هڅه کوي .
نوموړي زیاته کړه، د کابل حکومت د طالب چارواکو له سفرونو د ملګرو ملتونو سازمان ته هم شکایتونه وکړل په داسې حال کې چې ابوظبۍ او نورو هیوادونو ته یې د دغې ډلې د مشرانو د سفرونو په تړاو کوم غبرګون نه ښووده.
خو د بهرنیو چارو وزارت مرستیال نصیر احمد اندېشه بیا د نوموړي پر خبرو نیوکه وکړه او زیاته یې کړه چې د افغانستان حکومت ته دې د “کابل حکومت“ لفظ نه کاروي او دغه راز شکایت کول او نه کول د افغان حکومت قانوني حق ده چې باید حاکمیت ته یې درناوی وشي
