ليکوال: غورځنګ
د روانې ميلادي مياشتې پر شپاړسمه نېټه پاکستان هېواد ته د سعودي وليعهد محمد بن سلمان خپل سفر اعلان کړی وو، وليعهد محمد بن سلمان که څه هم دغه سفر د دې لپاره تر سره کولو تر څو د نوموړي هېواد په پلازمېنه (اسلام اباد) کې د روانې مياشتې په اتلسمه نېټه باندې په کېدونکې غونډه کې ګډون وکړي او د طالبانو له پلاوي سره په افغانستان کې د سولې پر راتلو بحث وکړي، خو د ملګرو ملتونو د امنيت شورای له لوري د طالبانو پر پلاوي باندې د لګېدلو نړيوالو تورونو له امله دغه غونډه لغوه اعلان شوه مګر وليعهد خپل سفر بيا هم تر سره کړ، چې د نوموړي دغه سفر د پاکستانيو چارواکو له لوري په ښه شکل بدرګه شوی دی.
د پاکستان خاورې د رسېدلو پر مهال د وليعهد ابن سلمان الوتکې ته څو پاکستانۍ الوتکې د دې لپاره پورته کړل شوې تر څو د نوموړي الوتکه په د مېلمستيا په بدرګه خپل نورخان نومي هوايي ميدان ته بوځي، همداشان د توپونو يو وويشت تشريفاتي ډزې ورته شوي دي، د دې تر څنګ د اسلام اباد د سرکونو پر غاړو د ابن سلمان عکسونه هم لګېدلي دي، په اسلام اباد کې د ابن سلمان د مېلمستيا لپاره د پاکستان لومړی وزير، د پوځ ستر جنرال جاوېد قمر باجوه او د دې هېواد نور لوړ پوړي چارواکي هم ولاړ وو، د ابن سلمان لپاره دومره ستر تشريفاتي ماحول جوړول دا ښي چې پاکستان او سعودي د سيمې د هېوادونو په کچه ښې او غوره اړيکې لري.
په خپل دغه سفر کې ابن سلمان د پاکستانيو چارواکو د بې شمېره غوښتنو په ځواب کې ويلي دي چې زه دلته يوازې د شهزاده او مېلمه په حيث نه بلکې د سفير په توګه هم راغلی يم! يعنې د پاکستان ټولو غوښتنو ته يې مثبت ځواب ووايه!
د ابن سلمان له دغه سفره پاکستان ډېرې لاسته راوړنې ودرلودلې، د تجارت په برخه کې د مختلفو ډالري پروژو په اړه ابن سلمان له پاکستاني چارواکو سره خبرې اترې او وعدې وکړې، دا رنګه په سعودي کې د هغو پاکستاني اتباعو په اړه چې د سعودي په زندانونو کې تر اوسه شپې او ورځې تېروي، هم ابن سلمان د نېکې رويې او ان د خلاصون وعده هم وکړه.
ابن سلمان د دې او دې ورته نورو وعدو تر څنګه له پاکستان د سعودي د اړيکو د لاښه کېدلو وعدې هم وکړې. چې دا ټولې د پاکستان هغه لاسته راوړنې دي چې له محمد ابن سلمان څخه يې دوی هيله کوله او د همدې لپاره يې ورته دومره ستر تشريفاتي ګاردان ورته درولي تر څو د عربو تېر پر ځان مين والی او غرور راوپاروي او د ځان لپاره يې په ګټه وکاروي.
چې دا خپله پاکستان ته تر ټولو لويې لاسته راوړنې دي.
