ننګرهار: د چاپې پر مهال ۸ ملکي وګړو ته مرګ ژوبله اوښتې
(کابل ټکی کام، ۱۳۹۷، سلواغه ۳۰)
د ننګرهار ولايت د رسنيو دفتر څخه په خپره شوې خبرپاڼه کې راغلي، چې د خوږياڼو ولسوالۍ مربوط په وزير ټټنګ سيمه کې د ملي امنیت ځانګړو ځواکونو په عملياتو کې نهه طالبان وژل شوي دي.
د رسنيو دفتر خبرپاڼه ليکي، په دغه عملياتو کې د طالبانو يو مرکز له منځه وړل شوی او نهه وسله وال طالبان وژل شوي.
خو طالبان او ځايي اوسېدونکي وايي، دغه عمليات د وزيرټټنګ په مياګانو کلي کې شوي چې ځانګړو ځواکونو د ملکي خلکو د کورونو دروازه په بمونو الوزولي، د خلکو قيمتي مالونه او پیسې يې له ځان سره وړي او ځينې کورونه يې ويجاړ کړي هم دي.
د سيمې يو تن اوسېدونکی تواب خان وايي، د چاپې عسکرو درې تنه عام کليوال شهيدان کړي او پنځه تنه نور ټپيان دي.
د په داسې حال کې ده، چې تيره شپه د ځانګړو، ګډو ځواکونو په عملياتو کې د کاپيسا په تګاب او د ميدان وردګو په چک ولسوالۍ کې هم ملکي وګړو ته ګڼ مالي زيانونه اوښتي دي.
طالبانو د دغه چاپو او شپنيو عملياتو په اړه په يوه خبرپاڼه کې ويلي: ” د عامو خلکو په حریمونو تجاوز او په دینې مراکز برید د امریکايي اشغالګرو له دین او هیواد سره ژوره دښمني په ډاګه کوي او هغوی چې په دغه راز جنایاتو کې همکاري ورسره لري په هيڅ معنا هم د دې ویاړلي ملت او هیواد ساتونکي نه نشي بلل کیدای؛ بلکې ملي خائنین او جنایت کاران دي چې باید په لازم وخت کې حساب کتاب ورسره وشي.”.
