ل. أ. هارون —
کله چې د پاکستان لومړي وزير طالبانو ته رسمي بلنه ورکړه ترڅو هلته له ده سره وویني، طالبانو هم پرته له انکاره ومنله.
په ورته وخت کې سمدستي د سعودي ولیعهد محمدبن سلمان هم پاکستان ته خپل سفر اعلان کړ، محمد بن سلمان د پاکستان نږدې ملګری او د کابل ادارې ټینګ ملاتړی دی، نوموړي د کابل ادارې ته ګڼې ژمنې ورکړې وې چې مهم یې طالبان په اصطلاح بین الافغاني مذاکراتو ته راضي کول و.
کله چې طالبانو پاکستان ته خپل رسمي سفر تایید او نیټه یې اعلان کړه نو دسعودي ولیعهد هم همدا موقع ولیده او پاکستان ته یې د ورتګ خبر ورکړ.
ده دا خیال کاوه چې ګواکې پاکستان به په طالبانو نفوذ لري په داسې حال کې چې هلته د پاکستان اقتصاد هم یو څه ضعیف دی نو پاکستان به هم باټې ورته ویشتي وي چې د سعودي ولیعهد دکابل ادارې سره په کړو ژمنو د وفا په خاطر او له امریکا د امتیازاتو اخستلو په خاطر دا موقع ولیده سمدلاسه یې پاکستان ته شل ملیارده ډالر هم ومنل.
طالبان تر هغې غلي ناست ول کله چې دسعودي ولیعهد له ګڼو هیلو سره پاکستان ته سفر پیل کړ نو طالبانو هم په نشه کې ورته تیشه ووهله او غونډه یې لغوه اعلان کړه.
اوس نو هم پاکستان لاسونه وڅنډل هم د سعودي ارمانونه تر پښو لاندې شول، طالبانو هم سمدلاسه اعلان وکړ چې غونډه یې په دې موخه لغوه کړې چې د دوي ځینې سیاسي مشران په تور لیست کې شامل دي او د نړیوالو بندیزونو له کبله نه شي کولای چې هیوادونو ته سفر وکړي.
دلته له یوې خوا طالبانو خپل استقلال ثابت کړی له بلې خوا یې سعودي ته څرګنده کړه چې پاکستان په دوی هیڅ نفوذ هم نه لري.
پاتې شوه د کابل اداره!
د کابل اداره چې په دې پوه شوه چې طالبان خو یوڅه چل کوي نو دوی هلته په دې خاطر چیغې شروع کړې چې د طالبانو استقلال تر پښو لاندي کړي.
دوی ګومان کاوه چې موږ به ملګرو ملتونو ته شکایت وکړو چی ولې هغه طالب مشران بهرني سفرونه کوي چې نومونه یې په تور لیست کې شامل دي نو دوی به هم سمدلاسه پرې بندیزونه ولګوي.
خو څنګه چې د الله جل جلاله او د بنده اراده یو ډول نه وي نو د دوی دې شکایت طالبانو ته ستره فایده او د کابل ادارې ته سخت زیان وکړ.
د طالبانو ګټه دا شوه چې د غونډې د لغوه کولو موقع یې په لاس ورکړه او دکابل ادارې ته يې دا زیان وکړ چې د رښتوني صلحې خنډ اصلا د کابل اداره ده او دا شکایت د دوی په تندي یو بل د صلحې د مخالفت تور داغ شو.
