(کابل ټکی کام، ۱۳۹۷، کب ۹)
د افغانستان په پروان ولايت کې د بهرنيو ځواکونو په تر ټولو ستر پوځي مرکز او هوايي ډګر توغنديز بريد شوی دی.
طالبانو ويلي، توغندي بريد د دوی له خوا شوی او بهرنيو ځواکونو ته پکې مالي او ځاني زيان اوښتی دی.
طالب وياند ذبيح الله مجاهد په خپله ټويټر پاڼه ليکي، “نن سهار د بګرام په هوایي اډه چې په هیواد کې دامریکایي اشغالګرو تر ټولو لوی مرکز دی، توغندیز برید شوی. اشغالګرو ته درانه ځاني او مالي تلفات اوښتي.”
د پروان ولسوالۍ دولتي سرچينې توغنديز برید تاييدوي خو بهرنيو ځواکونو تر اوسه په دې اړه څه نه دي ويلي.
طالبان وخت ناوخت د بګرام په ګډون د هېواد په بېلابېلو سيمو کې د بهرنيانو په ميشت ځايونو او هوايي ډګرونو توغنديز بريدونه کوي چې هغوی ته پکې مرګ ژوبله اوړي خو بهرنيان يې د خپلې پاليسۍ له مخې نه په ډاګه کوي.
