د امریکا او شمالي کوریا د مشرانو د نن ورځې غونډه بې نتیجې پای ته ورسیده
(کابل ټکی کام ۱۳۹۷ کب ۹)
سپینې ماڼۍ خبر ورکړی چې په ویتنام هیواد کې د شمالي کوریا د مشر کیم جونګ اون او د ټرمپ ترمنځ د نن ورځې لیدنه له کوم توافق پرته پای ته رسیدلې ده.
دغه غونډه چې د یاد هیواد په هانوي ښار کې پلان شوې وه نن تر وخت وړاندې پای ته رسیدلې ده.
د بي بي سي د راپور له مخې، د دواړو هیوادونو د مشرانو ترمنځ لیدنه ډیره ښه او جوړونکې وه خو مذاکراتو کومه نتیجه نه ده ورکړې او تر اوسه د راتلونکې ناستې خبر هم نه دی ورکول شوی.
ټرمپ ویلي، د شمالي کوریا له مشر سره ټینګې اړیکې لري، خو د اوس لپاره تصمیم دا نیول شوی چې کوم توافق ونه شي “ مونږ له کیم نه د ډیرو کارونو غوښتنه درلوده، خو هغه تیار نه و؛ هغه د ټولو تحریماتو لغوه کیدل غوښتل خو مونږ نه غوښتل دا کار وکړو“
ټرمپ دغه راز ویلي، نه غواړي پر شمالي کوریا نور بندیزونه ولګوي ، ځکه هلته هم خلک د ژوند کولو حق لري او دا هم نه غواړي چې لګول شوي بندیزونه په بشپړ ډول لغوه کړي.
تمه وه چې نن به دواړه لوري په یوه مشترکه اعلامیه سره سلا وکړي خو هسې ونه شو او ناسته پای ته ورسیدله.
د دواړو هیوادونو د مشرانو ترمنځ له خبرو اترو سره سم په نړیوالو بازارونو کې د جنوبي کوریا پولي واحد ښکته تللی دی
