ليکوال: غورځنګ
کله چې د نړۍ کفري ځواکمنو هېوادونو د زبرځواکې امريکا په مشرۍ زموږ پر ګران هېواد نظامي او فرهنګي يرغل وکړ نو د دې په خاطر چې ځواکونه يې په افغانستان کې د افغانانو له بريدونو څخه خوندي وي او له زياتو تلفاتو څخه په امان وي؛ د افغانستان له ګوټ ګوټ څخه يې پخواني کمونستان، ټوپکماران او د ازادۍ او غلامۍ له شعور څخه په پوره معنا بې خبره ځوانان راټول کړل او د ملي اردو په نوم يې يو ګډوډ او غير منظم لښکر ورڅخه جوړ کړ، دغه لښکر چې په غوڅ اکثريت يې په پوره معنا د امریکا ګټو ته ژمن دي؛ په تېرو نږدې دوو لسيزو کې يې يوازې د خپلو افغانانو له وژلو، بندي کولو، ځورولو او بې عزته کولو بل څه نه دي زده کړي، بلکې يوازې د امريکا لپاره يې د وطن ساتنې تر جعلي او درواغجن شعار لاندې خپل ملت ته غمونه او دردونه په تحفه کې ورکړي دي.
دغه د ملي اردو په نامه ځواک يوازې د افغانانو په ځورولو او وژلو هم بسنه ونه کړه بلکې په اوس وخت کې يې د اسلام د مقدساتو توهين هم را اخيستی دی، چې دا دی په تېره مياشت کې يې د خپلو بادارانو سره په ګډو عملياتو کې د هېواد د مختلفو سيمو څو تاريخي مدرسې او جوماتونه هم شهيدان، وران او ويجاړ کړل چې دا يې نه بښونکی جنايت او جرم دی.
په ټوله کې ويلای شو چې له ۲۰۱۴ ميلادي کال راهيسې امریکايانو د جنګ اولنۍ کرښه د خپلو تلفاتو د کمېدلو لپاره د همدغو بې شعوره ځوانانو پر اوږو واچوله، او بيا يې دغې ناولې پروسې ته د واک د لېږد پروسه وويله.
دلته مونږ هغو خلکو ته چې دغه کرايي قاتلان د ملي اردو په نامه پېژني؛ او هر کال يې ورځ لمانځي، څو خبرې عرض کوو تر څو حقائق ورته معلوم شي.
تاسې د هغې اردو ورځ لمانځئ! د کومې چې مالي مصارف له پيله بیا تر اوسه امريکا او ناټو ورکوي او مکمله د امريکا ګټو ته ژمنه ده، په داسې حال کې چې د کابل د ادارې ولسمشر (اشرف غني) هم تېره مياشت د اردو قرباني؟ امرکا ته منصوبه کړه او خورا د افتخار په لهجه يې وويل چې دا جګړه د امريکا جګړه ده او زمونږ اردو د امریکا لپاره له نړيوال ترورېزم سره مقابله کوي.
تاسې د هغې اردو ستاينه کوئ! او ورځ يې لمانځئ! کومه چې د خپل عام ولس د وژلو تر څنګ مسجدونه او مدرسې هم بمباروي او بيا په ډېره سپين سترګۍ سره وايي چې په دې کې طالبان وو، په داسې حال کې چې هلته به شهيدان شوي خلک ټول يا عام وګړي وي او يا به هم د قرانکريم کوچني حافظان وي.
د هغې اردو په ستاينه او صفت بوخت ياست! چې په نيمه شپه کې پر افغان ولس چاپه وهي او د سړيو تر څنګ ماشومان او ښځې هم په شهادت رسوي او بیا يې د وژلو لپاره دلائل هم تراشي.
دا چې اردو يا پوځ بايد د خپل هېواد يوه لوېشت خاوره هم په چا خرڅه نه کړي، خو برعکس دوی د هېواد په ختيځ کې پر ګاونډي هېواد پاکستان باندې د سيمو د خرڅېدلو تر څنګ په غير رسمي کرښه د اغزن تار لګول هم ومنل، تاسو د نړۍ تاریخ وګورئ! چې د کوم هېواد پوځ د خپل هېودا پر وړاندې داسې کړي دي؟
اردو يا پوځ خو د خپل هېواد د وګړو د مال او ځان ساتنه کوي، برعکس دوی خو خپل ولس په پرديو وژني او بيا يې په مختلفو تهمتونو باندې رنګوي هم، نو د دوی ورځ ولې بايد ولمانځل شي؟
په اخر کې د يوه مسلمان افغان په صفت هغو خلکو ته چې ځانونه د دې اردو خواخوږي بولي؛ وايم: لومړی د پوځ او اردو تعريف زده کړئ! او دا وپېژنئ! چې د هېواد اردو يا پوځ کوم کوم مسؤوليتونه لري؟
