د (ملا عمر پټ ژوند) کتاب کې راغلي، هغه د ژوند تر پایه افغانستان کې و
(کابل ټکی کام، ۱۳۹۷، کب ۲۰)
د هالنډ يوې ليکوالې د طالبانو د تحريک بنسټګر ملا محمد عمر مجاهد په اړه په يوه کتاب کې ليکي چې نوموړی د ژوند تر پايه له افغانستانه نه دی وتلی.
دغه کتاب چې په هالنډۍ ژبه دی نوم يې (د ملاعمر پټ ژوند) ليکواله يې وايي چې د هغه د خصوصي ساتونکي او هغه ته نږدې ځينو طالبانو څخه يې معلومات پکې ترلاسه کړي دي.
په کتاب کې راغلي، امریکايي استخباراتو د ملاعمر لټون په پاکستان او نورو سيمو کې کاوه خو هغه په زابل کې د “وولورين” په نامه د امريکايي پوځي اډې په څو کيلو مترۍ کې پټ ژوند کاوه.
د کتاب هالنډۍ ليکواله بيتا ډام وايي، د دغه کتاب پر لیکلو، څېړنې او د طالبانو له غړو سره په مرکو يې پنځه کاله تېر کړي زياتوي توانيدلې چې د ملا عمر د خصوصي ساتونکي ملا جبار عمري سره هم مرکه وکړي چې د عمر تر پايه ۲۰۱۳ کال پورې له ملاعمر سره و .
ډام وايي، ملا عمر په دغه کور کې یوازې له څو تنو سره ژوند کاوه خو امريکايي امريکايي استخبارات چې دغه کور يې پلټلی بيا هم ونه توانيدل چې د خپلو ټولو امکاناتو په لرلو سره د هغه درک معلوم کړي.
په کتاب کې راغلي،ملا عمر به له خپلو ملګرو سره د قاصد په واسطه اړيکې نيولې، کورنۍ يې په پاکستان کې وه او دی چې له ناروغۍ ډير رنزيده د عمر تر پايه ډاکټر ته نه ولاړ چې په ۲۰۱۳ د اپريل مياشت کې ومړ او له تابوت پرته په یوه نامعلوم ځای کې دفن کړای شو.
