په کندوز کې ۳ تنه امریکايي او کمانډو پوځیان وژل شوي دي
کابل ټکی کام(دوشنبه،۲۷کب، ۱۳۹۷ل):
د کندوز ولایت په چهاردرې ولسوالۍ کې د شپنیو عملیاتو پرمهال طالبانو سره جګړه کې د ۳ تنه امریکايي او کمانډو پوځیانو د وژل کېدو خبر ورکړل شوی دی.
د طالبانو ویاند ذبیح الله مجاهد رسنیو ته ویلي، چې تیره شپه امریکايي او کمانډو پوځیانو د کندوز ولایت چهاردرې ولسوالۍ په خلازیو سیمه کې شپني عملیات پیل کړل، چې طالبان ورسره ونښتل.
نوموړی زیاتوي، په دغو نښتو کې یو کمانډو او ۲ تنه امریکايي پوځیان وژل شوي او یو شمېر نور ټپیان دي.
د مجاهد په خبره دغه نښتې د شپې تر لسو بجو دوام کړی، چې وروسته ګډو ځواکونو په سیمه درنه بمباري کړې او له سیمې څخه یې په شاتګ کړی دی.
په کندوز ولایت کې ۲ تنه امریکايي پوځیان په داسې مهال وژل کیږي، چې د طالبانو او امریکايي استازو ترمنځ د خبرو له جریان سره همهاله وسله والو طالبانو په امریکايي پوځیانو خپلو بریدونو ته زور ورکړی دی.
دوه اونۍ وړاندې هم وسله والو طالبانو په سویل کې د امریکايي پوځیانو په تر ټولو سترې پوځي اډې(باسټن کیمپ) پراخ ډله ییز بریدونه وکړل، چې تر ۴۶ ساعتونو یې دوام وکړ او طالبانو په کې لسګونو امریکايي پوځیانو ته د مرګ ژوبلې اړولې خبر ورکړی وو.
