ایس ډي ایف: د سوريې پر خاوره د داعش واکمني په مکمله توګه ختمه شوه
(کابل ټکی کام، ۱۳۹۸، وری ۴)
د سوريې ديموکراتيک يا “ایس ډي ايف” ځواکونه وايي په دغه هيواد کې يې داعش ډله په مکمله توګه ختمه کړې ده.
د ايس ډي ايف وياند مصطفی بالي ويلي، په سوريه کې يې د داعش پنځه کلن خلافت پای ته رسولی او د هغوی وروستی پناه ځای باغوز يې هم ترې نيولی دی.
بالي وايي، د داعش په نوم خلافت چې يو مهال يې په سوريه او عراق کې زیاتې سيمې لاندې کړې وې اوس ختم شوی دی.
د مارچ په لومړيو کې د سوريې ځواکونو په باغوز کې د داعش په وروستي پناه ځآی عمليات پيل کړل چې تيره ورځ د دغه ځواکونو وياند وويل یاده سيمه يې نيولې.
مصطفی بالي په یوه ټویټر پیغام کې ليکلي:”د سوریې دیموکراتیک ځواکونه د تش په نامه خلافت بشپړ له منځه تګ او د داعش ډلې له لاسه د دوی ټولې ساحې وتل اعلانوي”.
په باغوز کې د سلګونو داعشيانو د تسليميدو تر څنګ په زيات شمير کې ملکي خلکو هم پناه اخيستې وه چې د چارواکو په وينا د ملکيانو لپاره جوړو شويو پنډغالو ته انتقال شوي دي.
داعش ډلې د ۲۰۱۴م کال په جون مياشت کې په عراق او سوريه کې د دوی تر واک لاندې سيمو کې د خلافت اعلان وکړ.
داعش د خپلې تګلارې سره سم د عراق او سوريې په ځينو ولايتونو کې ګڼ کسان د ګوډاګيتوب، خيانت، کفر او شيعه توب په نومو ووژل او په ګڼ ميشتو ځايونو کې يې چاودنې کولې.
دغه راز کردي، دیموکراتيکو او د نړيوال ائيتلاف ځواکونو هم په یاده موده کې د داعش په نوم زرګونه ملکیان په بمباريو او عملياتو کې وژلي دي .
کردي او د سوريې ديموکراتيکو ځواکونو په ۲۰۱۵م کال کې د نړيوال ائيتلاف په ملاتړ د داعش پرضد عمليات پيل کړي و.
که څه هم چارواکي په عراق او سوريه کې د داعش ډلې د ختميدلواعلان کوي خو لا هم د دغه ډلې د مشر ابوبکرالبغدادي چې پخوا يې څو ځلې د مرګ او ژوند راپورونه خپاره شوي معلومات نه شته.
