(کابل ټکی کام، ۱۳۹۸، وری ۵)
د افغانستان لپاره د روسيې ځانګړی استازی ضمیر کابلوف وايي، په افغانستان کې د امريکايي ځواکونو نظامي اډو ته هيڅ اړتيا نه ليدل کيږي؛ بايد ټولې اډې ختمې شي.
نوموړي د ريانوويستي خبري اژانس ته ويلي، ښايي امریکا هڅه وکړي څو د ګډ حکومت سره له امضا شوي تړون څخه په ګټې اخيستو په افغانستان کې نظامي اډې ولري خو په وينا يې دا چې اوس مهال په قطر کې د امريکايي ځواکونو د وتلو پر سر خبرې روانې دي نو په دغه هيواد کې د نظامي اډو جوړولو ته اړتيا نه ليدل کيږي.
کابلوف ويلي، اوس د دې وخت دی چې امريکايان د افغانستان څخه له يوې مخې ټولې نظامي اډې ټولې کړي.
دغه راز نوموړی زياتوي، امريکا له چین او روسيې غوښتي چې له طالبانو سره په روانو مذاکراتو کې ورسره همکاري وکړي.
کابلوف وايي، دواړه هيوادونه دغه مذاکراتو ته ژمن او په افغانستان کې د روانو جګړو او پوځي اقداماتو د پای ته رسيدو غوښتونکي دي.
تر دې مخکې هم د افغانستان ګاونډيو هيوادونو ايران، پاکستان او روسيې په افغانستان کې د امريکايي پوځيانو له پاتې کيدو سره مخالفت څرګند کړی دی.
طالبانو او امريکا، له افغانستانه د بهرنيو ځواکونو د وتلو او دا چې افغان خاوره به د نورو هيوادونو پرضد نه کارول کېږي پنځه ځلې خبرې کړي او ښايي راتلونکي پړاو برې په اپريل مياشت کې ترسره شي.
