هلمند: د برېښنا پروژه کې فساد شوی؛ د فعالانو ګواښ
(کابل ټکی کام، ۱۳۹۸، وری ۵)
د هلمند مدني فعالان وايي، د هلمند د برېښنا په هغه پروژه کې پراخ فساد شوی چې له کجکي ولسوالۍ څخه يې د ۴۵ ميليونه ډالرو په ارزښت لښکرګاه ته مزي لېږدول.
د دغه ولايت مدني فعال عبدالخالق ځواکمن وايي، د برېښنا ستنو او مزو لپاره د پنځه څلوېښت ميليون ډالرو په ارزښت پروژه پيل شوې وه او داسې مزي پکې کارول شوي چې د برېښنا د لېږد وړتيا نه لري.
مدني فعالانو ګواښ وکړ که روانه مياشت کې د تړون له مخې مزي تير نه شي؛ دوی به غیر ظرفيت لرونکې ستنې ړنګې او مزې وشلوي.
په عين حال کې د هلمند د والي وياند یاسين خان هم مني چې يادې پروژه کې د شوي تړون پر اساس کار نه دی شوی نو ځکه يې دغه پروژه تړلې ده.
هغه وايي، د بې کيفيته ستنو او مزو تيرولو له کبله يې د يادې پروژې کار بند کړی او دا مهال د برېښنا په بخوانيو مزيو هلمند او کندهار ته برېښنا لېږدول شوې ده.
تر اوسه د یادې پروژې مسؤولينو په دې اړه څه نه دي ويلي.
په افغانستان کې په سړکونو، ودانيزو چارو او ګڼو پروژو کې د فساد له کبله غير معياري او بې کيفيته مواد کارول شوي چې د څو کلونو په تيريدو ډيری سړکونه، ودانۍ او پلونه د غير معياري کار له امله له کاره لويدلي دي.
